İsrailin ifrat sağçı milli təhlükəsizlik naziri İtamar Ben-Qvir Qüdsdəki islam müqəddəsliklərinə, xüsusən də ötən avqust ayında Əl-Əqsa məscidinə qarşı artan pozuntularla paralel olaraq Qəzza zolağının sakinlərinin deportasiyası planını irəli aparmaqda davam edəcəyini bildirib.

Ben-Qvir "X" sosial şəbəkəsindəki hesabında etdiyi paylaşımda: "Geri çəkilməyəcəyəm, dayanmayacağam və bütün Qəzza sakinlərini sözdə könüllü şəkildə deportasiya edəcək 'Ayrılma 710' planını təşviq etməyi davam etdirəcəyəm".-deyib.

İki gün öncə bəhs etdiyi və 7 il ərzində Qəzza zolağından təxminən 1,86 milyon fələstinlinin köçürülməsinə əsaslanan etnik təmizləmə layihəsindən əl çəkməyəcəyini vurğulayan Ben-Qvirin təqdim etdiyi plana görə, ilk il ərzində Qəzzadan 250 min fələstinlinin çıxarılması, 3 il ərzində bu rəqəmin 1,11 milyona, 7 il ərzində isə 1,86 milyona çatdırılması hədəflənir.

Həmin paylaşımında Ben-Qvir: "Məbəd dağında (Əl-Əqsa məscidi) suverenliyi gücləndirməyə, həbsxanalardakı məhbusların (fələstinli əsirlərin) saxlanma şəraitini sərtləşdirməyə və ölüm hökmü qanununu icra etməyə çalışıram".-deyə əlavə edib.

Bundan bir neçə gün əvvəl Fələstin Vəqflər və Dini İşlər Nazirliyi yaydığı bəyanatda İsrail hakimiyyət orqanları və məskunlaşanların ötən avqust ayında islam müqəddəsliklərinə qarşı pozuntuları artırdığını, Əl-Əqsa məscidinə 26 basqın qeydə alındığını açıqlamışdı.

Britaniyanın tənqid edilməsi

Digər tərəfdən, ABŞ-nin İsraildəki səfiri Mayk Hakabi şənbə günü Böyük Britaniyanın xarici işlər naziri Ed Milibəndin Qəzza zolağındakı humanitar böhranı tənqid etməsinə cavab olaraq Britaniyanı antisemitizmdə ittiham edib.

Prezident Donald Trampın Böyük Britaniya da daxil olmaqla bəzi müttəfiq ölkələrə vaxtaşırı yönəltdiyi tənqidlərdən asılı olmayaraq, bu bəyanat amerikalı bir rəsminin ən yaxın müttəfiq sayılan Londona qarşı qeyri-adi dərəcədə sərt ton nümayiş etdirməsini əks etdirir.

Amerikalı səfirin reaksiyası Milibəndin videomüraciət yaymasından sonra gəlib. Britaniyalı nazir həmin çıxışında 2023-cü ilin oktyabr hücumundan sonra başlayan İsrail-HƏMAS müharibəsi səbəbilə fəlakət həddinə çatan və mühasirədə qalan fələstinli anklavındakı acınacaqlı durum qarşısında Londonun hərəkətə keçməsinin vacibliyini vurğulamışdı.