Birləşmiş Ərəb Əmirlikləri (BƏƏ) Əlcəzairin iki ölkə arasındakı diplomatik əlaqələri dayandırmaq qərarına rəsmi münasibət bildirərək, bu vəziyyətin müvəqqəti xarakter daşıyacağına ümid etdiyini vurğulayıb. Rəsmi Əbu-Dabi eyni zamanda əlcəzairlilərə və ölkədə yaşayan Əlcəzair icmasının üzvlərinə dərin hörmət və ehtiramını ifadə edib.

ArabAZ xəbər verir ki, BƏƏ Xarici İşlər Nazirliyinin yaydığı bəyanatda bütün dövlətlərlə münasibətlərin əhəmiyyəti önə çəkilib və bu əlaqələrin inkişaf etdirilməsi və möhkəmləndirilməsi istiqamətində ölkənin sadiqliyi təsdiqlənib.

BƏƏ həmçinin Əlcəzair xalqına yüksək qiymət verdiyini, iki xalq arasındakı tellərlə, xüsusən də Əmirliklərdə yaşayan və ya ölkəyə səfər edən əlcəzairlilər vasitəsilə qurulan bağlarla qürur duyduğunu diqqətə çatdırıb. Son statistik məlumatlar açıqlanmasa da, 2020-ci ilin göstəricilərinə görə BƏƏ-də təxminən 30 min Əlcəzair vətəndaşı yaşayırdı.

Diplomatik əlaqələrin "şifrələrin açılmasını tələb edən tapmacalar və işarələrlə deyil, sağlam düşüncə, qarşılıqlı ünsiyyət və maraqların aydınlığı ilə idarə olunduğunu", – deyə BƏƏ Prezidentinin diplomatik müşaviri Ənvər Qarqaş bildirib.

Beynəlxalq siyasət və diplomatik fəaliyyətlərlə bağlı tez-tez şərhlər verən Qarqaş "qeyri-müəyyənliyin bir siyasət olmadığını" qeyd edərək, "uğurlu diplomatiyanın mövqelərin aydınlığı, maraqların və fikir ayrılıqlarının düzgün idarə olunması üzərində qurulduğunu", – deyə o əlavə edib.

Xatırladaq ki, fevral ayında Əlcəzair 2013-cü ildə BƏƏ ilə imzalanmış Hava Nəqliyyatı Xidmətləri Sazişinin ləğvi prosesinə başladığını rəsmən bildirmişdi. Lakin Əmirliklər tərəfi sərnişinləri arxayın edərək bu addımın hava hərəkəti əməliyyatlarına dərhal heç bir təsir göstərməyəcəyini bəyan etmişdi.

BƏƏ-nin Baş Mülki Aviasiya İdarəsi isə sözügedən tədbirin beynəlxalq saziş çərçivələrində nəzərdə tutulmuş hüquqi mexanizmlər daxilində atıldığını bildirib.