Yəməndə yenidən alovlanan hərbi toqquşmalar təmas xətlərində ciddi dəyişikliklərə səbəb olub; ölkənin qərb sahilində və Taizin qərbində gedən döyüşlər dünəndən etibarən son dərəcə təhlükəli mərhələyə qədəm qoyub. Husi terroçuları qərb sahilində, əl-Muxa şəhərində və bu şəhərə şimaldan və şərqdən aparan əsas hərbi istiqamətlərdə öz mövqelərini və dislokasiya zonasını xeyli genişləndiriblər.
ArabAZ xəbər verir ki, Ccəbhədə yaranan bu təhlükəli vəziyyət qarşısında Yəmən Prezident Rəhbərlik Şurasının sədr müavini, general-leytenant Tariq Saleh qərb sahilindəki silahlı qüvvələrə dərhal sıralarını yenidən nizamlamaq və mövqeləri möhkəmləndirmək barədə göstəriş verib. Eyni zamanda Birgə Qüvvələr hərbi birləşmələri yenidən cəmləşdirmək və onların təmas xəttində düzülüşünü təşkil etmək məqsədilə əl-Muxadan cənubda yerləşən Zübab bölgəsində yeni komanda qərargahı yaradıb.
Hadisələri diqqətlə izləyən Yəmən Prezident Rəhbərlik Şurasının sədri Rəşad əl-Əlimi dövlətin öz vətəndaşlarını qorumaq, rəsmi institutları bərpa etmək, bütün ölkə ərazisində mərkəzi hakimiyyəti bərqərar etmək, habelə sahilləri, limanları və ərazi sularını tam müdafiə etmək üzrə məsuliyyətini qətiyyətlə yerinə yetirməyə davam edəcəyini vurğulayıb.
O, xüsusilə dəniz təhlükəsizliyinə toxunaraq sərt xəbərdarlıq edib. "Babül-Məndəb boğazının ikinci bir Hörmüzə çevrilməsinə, yaxud Yəmənin İran rejimi adından geosiyasi şantaj platformasına çevrilməsinə əsla imkan verilməyəcək", – deyə o bildirib.
