Birləşmiş Ərəb Əmirliklərinin (BƏƏ) "Əl-İttihad" Xeyriyyə Fondu Filippində ehtiyac içində yaşayan ailələr üçün yeni yaşayış massivi inşa edib. Açılış mərasimində iştirak edən fondun baş katibi Harib Səlim əl-Əryani evlərin açarlarını aztəminatlı ailələrə təqdim edib.
ArabAZ xəbər verir ki, layihə ən ucqar və şəraitsiz bölgələrdə yaşayan, sığınacaq tapmaqda çətinlik çəkən ailələrin güzəranını yaxşılaşdırmaq məqsədilə həyata keçirilib.
Yeni salınan qəsəbə 25 fərdi yaşayış evindən, bir məsciddən və su təminatı üçün quraşdırılmış xüsusi quyudan ibarətdir. Ümumilikdə 120 nəfərin məskunlaşacağı bu massiv sakinlərin bütün təməl ehtiyaclarını ödəmək üçün tam şəraitlə təmin olunub.
Açılışda çıxış edən Harib Səlim əl-Əryani bildirib ki, məqsəd sadəcə birdəfəlik ərzaq paylamaq yox, insanların həyatını kökündən dəyişən daimi layihələr icra etməkdir.
"Yaşayış kompleksi layihələri ailələrin həyatında birbaşa və uzunmüddətli iz qoyan dayanıqlı xeyriyyəçiliyin ən bariz nümunəsidir", - deyə o əlavə edib.
Baş katib həmçinin vurğulayıb ki, bu təşəbbüslər BƏƏ-nin qurucusu Şeyx Zayed bin Sultan Əl Nəhyanın əsasını qoyduğu humanist dəyərlərə söykənir. Fond rəhbərliyi tikintiyə vəsait ayıran xeyriyyəçilərə və yerli tərəfdaşlara təşəkkür edərək bu cür sosial layihələrin davam edəcəyini bəyan edib.
