İsrailin ifrat sağçı milli təhlükəsizlik naziri İtamar Ben-Qvir Qəzza zolağında hər gecə 30–40 nəfərin hədəfli şəkildə məhv edilməsinə çağırış edib. Ben-Qvir bu açıqlamanı vaxtilə Qəzzada saxlanılmış keçmiş girov Rom Braslavskinin təqdim etdiyi podkastda səsləndirib. İsrailin 7 oktyabr 2023-cü il hücumundan sonrakı vəziyyətini müzakirə edərkən nazir son vaxtlar Qəzzaya endirilən zərbələrin intensivliyinin azalmasını tənqid edib.
Ben-Qvir: İsrail Trampa da “yox” deyə bilər, Livan atəşkəsi qəbul edilməməlidir
"Baş nazir Benyamin Netanyahu ilə razılaşmadığım heç kimə sirr deyil. Mən hesab edirəm ki, Qəzzada hədəfli məhvetmə əməliyyatları aparılmalı və hər gecə 30–40 nəfər aradan qaldırılmalıdır. Təkcə dərhal təhlükə yaradanlar deyil, orada yaşamağa layiq olmayan insanlar var. Onlar yaşamamalıdırlar, onlar heç insan da deyillər".- deyə o bildirib.
İsrailin milli təhlükəsizlik naziri Qüdsdə 300 min yəhudinin silahlanmasına icazə verib
Ben-Qvir həmçinin fələstinlilərin Qəzzadan kütləvi şəkildə köçürülməsinə və zolaqda yəhudi məskunlaşmasının yenidən bərpa olunmasına çağırıb, beynəlxalq hüquq ekspertləri isə bu addımın "etnik təmizləmə" səviyyəsinə çata biləcəyini qeyd edirlər.
İsrail 20 il əvvəl Qəzza zolağından geri çəkilmiş, "Quş Katif" kimi tanınan 21 yəhudi qəsəbəsini ləğv etmiş və qoşunlarını ərazidən çıxarmışdı.
"Mən bütün Qəzzanı bizimki kimi görürəm", – deyən Ben-Qvir təkcə "Quş Katif"də deyil, bütün Qəzza ərazisində məskunlaşma yerlərinin salınmasına və mümkün qədər çox fələstinlinin köçürülməsinə çağırıb. O əlavə edib ki, terrorçu hesab etdikləri şəxslər köçürülməməli, "bir-bir öldürülməlidir".
Ben-Qvir və digər israilli rəsmilərin oxşar açıqlamaları daha əvvəl geniş beynəlxalq qınağa səbəb olub və onlardan bəziləri BMT-nin Beynəlxalq Məhkəməsində "soyqırımı törətmək niyyəti"nin sübutu kimi təqdim edilib. İsrail isə Qəzzada soyqırımı törətməsi iddialarını rədd edir.
Ben-Qvirin son bəyanatları İsrail mediasında geniş yer almayıb; bu isə 27 oktyabrda keçirilməsi planlaşdırılan seçkilər ərəfəsində vaxtilə kənar hesab edilən ifrat baxışların cəmiyyətdə artan mövcudluğunun göstəricisi kimi qiymətləndirilir.
"Associated Press" agentliyinin hesabatına görə, Ben-Qvirin İsrail ordusu üzərində birbaşa səlahiyyəti yoxdur və Qəzzaya zərbələr endirmək barədə əmr verə bilməz. Lakin ifrat sağçı dairələrdə keçirdiyi onilliklərdən sonra o, bu gün ölkənin ən nüfuzlu simalarından birinə çevrilib.
Ben-Qvir İsrailin təhlükəsizlik strukturlarının mühüm hissələrinə, o cümlədən polisə və Qəzza ilə İordan çayının qərb sahilindən olan minlərlə fələstinlinin saxlanıldığı həbsxana sisteminə nəzarət edir.
O, əvvəllər fələstinli məhbuslara verilən qida payının azaldılması ilə açıq şəkildə öyünmüşdü. İsrail Ali Məhkəməsi 2025-ci ildə çıxardığı qərarda Ben-Qvirin nəzarəti altındakı Həbsxanalar Xidmətinin fələstinli məhbusları yaşayış üçün minimum zəruri qidadan məhrum etdiyini təsdiqləmişdi.
Yaxın vaxtlara qədər İsrail Qəzzaya demək olar ki, hər gün zərbələr endirirdi; Qəzza Səhiyyə Nazirliyinin məlumatına görə, ötən ilin oktyabrında atəşkəs razılaşması qüvvəyə mindikdən bəri bu zərbələr nəticəsində 1250-dən çox insan həlak olub.
Ötən həftə İsrail mediası zərbələrin endirilməsi səlahiyyətinin yalnız Baş Qərargah rəisinə verildiyini bildirmiş, bu isə Ben-Qvir də daxil olmaqla ifrat sağçı deputatların qəzəbinə səbəb olmuşdu.
ABŞ Prezidenti Donald Trampın irəli sürdüyü ən son plana əsasən, İsrail qüvvələrinin hücumları dayandırması və Qəzzadan geri çəkilməyə başlaması müqabilində HƏMAS tədricən silahlarını təhvil verməlidir.
HƏMAS planla razılaşıb, lakin ağır silahların təhvil verilməsini Fələstin dövlətinin qurulması ilə şərtləndirib; hazırkı İsrail hökuməti və ölkənin siyasi elitasının böyük əksəriyyəti isə bu şərti qətiyyətlə rədd edir.
