BAKI,VOA
İsrailin milli təhlükəsizlik naziri İtamar Ben-Qvir bazar günü səhər saatlarında bir qrup yəhudi köçkünün müşayiəti və İsrail polisinin ciddi mühafizəsi altında Məscidül-Əqsa kompleksinə daxil olub. Bu addım regionda dini gərginliyi artıran növbəti təxribat kimi qiymətləndirilir.
Fələstinin rəsmi "VAFA" xəbər agentliyinin məlumatına görə, köçkünlər Məscidül-Əqsanın həyətində talmud duaları oxuyublar. Bu hərəkət kompleksdə yeni dini reallıq yaratmaq və "zaman və məkan bölgüsü"nü (müsəlman və yəhudilər arasında bölmək cəhdi) rəsmiləşdirmək istiqamətində atılan addım kimi səciyyələndirilib.
Qüds valiliyi bəyanat yayaraq bildirib ki, bu hadisə işğal altındakı Qüdsdə İslam və xristian müqəddəs yerlərinə qarşı artan pozuntuların və ibadət edənlərin girişinə tətbiq edilən məhdudiyyətlərin bir hissəsidir.
Ben-Qvirdən Netanyahuna təzyiq
Ben-Qvir hadisə yerində çəkilmiş və ofisi tərəfindən yayımlanan video müraciətində kəskin ifadələr işlədib:
"Bu gün burada özümü məkanın sahibi kimi hiss edirəm. Hələ görüləcək çox iş, təkmilləşdiriləcək çox məqam var. Daha çox iş görülməsi üçün Baş nazir Benyamin Netanyahuya təzyiq göstərməyə davam edirəm, addım-addım irəliləməliyik."
Beynəlxalq reaksiya: İordaniyadan sərt qınaq
İordaniya Xarici İşlər Nazirliyi Ben-Qvirin bu addımını pisləyən bəyanat yayıb. Bəyanatda bu ziyarət "Qüds-i Şərifdəki mövcud tarixi və hüquqi statusun kobud şəkildə pozulması, müqəddəsliyin təhqir edilməsi və qəbuledilməz təxribat" adlandırılıb.
Nazirin mətbuat katibi bildirib ki, Ben-Qvir yəhudi ziyarətçilər üçün giriş icazələrinin artırılmasına və məkanda duaların təşkilinə çalışır. O, həmçinin nazirin ərazidə dua etdiyini təsdiqləyib.
Hələlik Netanyahunun ofisindən məsələ ilə bağlı şərh verilməyib. Keçmişdə Ben-Qvirin oxşar addımları Netanyahunu "status-kvonun dəyişməz qaldığını" təsdiqləyən bəyanatlar verməyə məcbur etmişdi.
