BAKI, AzerVoice, Səməd Əyyubov – İsrailin milli təhlükəsizlik naziri İtamar Ben Qvirin rəhbərliyi ilə 1 251 yəhudi Əl-Əqsa məscidinə basqın edib.
AzerVoice xəbər verir ki, bu barədə Qüdsdəki İslam Vəqfləri İdarəsi məlumat verib.
Bildirilib ki, Ben Qvir "Likud" partiyasının Knesset üzvü Amit Halevi ilə birlikdə məscidə daxil olaraq Talmud ayinləri icra edən və rəqs edən qruplara rəhbərlik edib. O, həmçinin Qüdsün köhnə şəhər hissəsində gecə saatlarında provokativ yürüş də təşkil edib.
Hadisə, yəhudi təqviminə görə "Məbədin dağıdılmasının ildönümü" günü ilə eyni vaxta təsadüf edib. Bu çərçivədə, bəzi ultraortodoks yəhudi təşkilatları məscidə daha genişmiqyaslı yürüşlərə çağırış ediblər.
Ben Qvirin özü də Hərəm əş-Şərif ərazisində dua etdiyini açıqlayıb. Bu isə, onilliklər əvvəl razılaşdırılmış status-kvo qaydalarına ziddir. Qaydalara əsasən, ərazi İordaniya dini idarəsinin nəzarətindədir və yəhudilərin yalnız ziyarət etməsinə icazə verilir. Dualar isə qadağandır.
“Məbəd Dağı İdarəsi” adlı yəhudi təşkilatının yaydığı görüntülərdə Ben Qvirin dua edərkən məscidə daxil olduğu görünür. O, daha əvvəl də bu əraziyə daxil olaraq dualara icazə verilməsi tələbi ilə çıxış etmişdi. Bu dəfə isə Qəzzadakı müharibədə HƏMAS üzərində qələbə və israilli girovların azad olunması üçün dua etdiyini bildirib. O, həmçinin İsrailin Qəzza zolağını tam nəzarətə götürməsi çağırışını yenidən səsləndirib.
Qeyd edək ki, məscidin dini statusuna edilən hər hansı müdaxilə beynəlxalq ictimaiyyət, xüsusilə də İslam dünyası tərəfindən kəskin qəzəblə qarşılanır və bu cür halların əvvəlki illərdə zorakılıqla nəticələndiyi məlumdur. Hazırkı aksiyada zorakılıq qeydə alınmayıb.
Fələstin Prezidenti Mahmud Abbasın sözçüsü Nabil Əbu Rudeyne beynəlxalq ictimaiyyəti, xüsusilə ABŞ-ı İsrailin Qəzzadakı hərbi əməliyyatlarını və Əl-Əqsadakı təxribatları dayandırmaq üçün təcili tədbirlər görməyə çağırıb.
İordaniya Xarici İşlər Nazirliyi də bəyanat yayaraq Ben Qvirin bu addımını “qəbuledilməz təxribat və təhlükəli gərginlik” kimi qiymətləndirib.
Fələstin xəbər agentliyi WAFA isə məlumat verib ki, ekstremist yəhudi təşkilatları "Məbədin dağıdılması" gününə uyğun olaraq Əl-Əqsa məscidinə genişmiqyaslı basqın çağırışları ediblər. Qüds valiliyinin açıqlamasına əsasən, bu ilki basqın planları məscid üçün son dərəcə təhlükəlidir və məqsəd dini və hüquqi “qırmızı xətlərin” pozulmasıdır. Bu planların həyata keçirilməsi üçün İsrail hökumətinin tam dəstəyi olduğu bildirilib.
Həmçinin qeyd edilib ki, bu gərginlik, Ben Qvirin daha əvvəl polisə verdiyi göstərişlərlə (məscid daxilində yəhudi məskunlaşanlara rəqs və mahnı oxumağa icazə verilməsi) ilə müşayiət olunur. Bu isə status-kvonu zorla dəyişdirmək cəhdi kimi qiymətləndirilir.
Bundan əvvəl, İsrail qüvvələri müsəlmanların dördüncü müqəddəs məkanı sayılan Hərəmi-İbrahim məscidinə basqın etmişdi.
