BAKI,AzerVoice
Əlcəzair hökuməti 2026-cı il üçün ölkə tarixində ən böyük dövlət büdcəsini təsdiqləyib. Ümumi xərclərin həcmi 131 milyard dollar təşkil edir ki, bu da 2025-ci illə müqayisədə 5 milyard dollar çoxdur. Artım əsasən müdafiə və sosial təminat sahələrinə yönəlib.
Maliyyə Qanunu layihəsinə əsasən, müdafiə xərcləri 27,17 milyard dollara çatdırılıb - bu, ötən illə müqayisədə təxminən 2 milyard dollar artım deməkdir. Ümumi gəlirlər 62 milyard dollar səviyyəsində proqnozlaşdırılır, sosial transfertlər və subsidiyalar üçün isə 44,6 milyard dollar ayrılıb. Onların 3,3 milyard dollarlıq hissəsi işsizliklə mübarizəyə yönəldiləcək.
Layihədə yeni vergilərin tətbiqi nəzərdə tutulmur, lakin hökumət vergi qaçaqmalçılığına və kölgə iqtisadiyyatına qarşı sərt tədbirlər görməyi planlaşdırır. Kölgə iqtisadiyyatının həcmi illik 50–60 milyard dollar olaraq qiymətləndirilir.
Yeni tədbirlər arasında vergi pozuntularına görə cərimələrin artırılması, maliyyə əməliyyatlarına nəzarətin gücləndirilməsi, valyuta qaçaqmalçılığı və pul yuyulmasına qarşı yeni qaydalar, eləcə də qiymətli metalların ticarətinə nəzarət və lisenziyalaşdırma sistemi yer alır.
Əlcəzair iqtisadiyyatı hələ də neft və qaz gəlirlərindən yüksək dərəcədə asılıdır - bu sektor ölkənin xarici valyuta gəlirlərinin 90 faizini təşkil edir. Buna baxmayaraq, 2024-cü ildə Əlcəzair müsbət iqtisadi nəticələr göstərib və Afrikada Cənubi Afrika və Misirdən sonra üçüncü ən böyük iqtisadiyyat kimi qiymətləndirilib.
