BAKI, AzerVoice, Nailə Babazadə
Birləşmiş Millətlər Təşkilatının (BMT) Yaxın Şərq Sülh Prosesi üzrə Xüsusi Koordinatorunun müavini Ramiz Ələkbərov, Qəzzada İsrailin hərbi əməliyyatlarını tənqid edərək bölgədəki vəziyyətin əxlaqi, siyasi və hüquqi baxımdan qəbuledilməz olduğunu bəyan edib.
AzerVoice xəbər verir ki, Ramiz Ələkbərov bu fikirləri BMT Təhlükəsizlik Şurasının “Fələstin məsələsi də daxil olmaqla Yaxın Şərqdəki vəziyyət” mövzusunda keçirilən iclasında səsləndirib.
“Qəzza zolağında İsrailin hərbi əməliyyatlarının intensivləşməsi məni dəhşətə salır,” – deyə Ələkbərov bildirib və əlavə edib ki, İsrailin hücumları fələstinlilərə görünməmiş miqyasda ölüm və dağıntı gətirməyə davam edir.
O, qadınlar və uşaqlar da daxil olmaqla mülki vətəndaşların hədəfə alınmasını qəti şəkildə pisləyib, bölgədə yaşanan faciənin insan əli ilə yaradılmış bir aclıq fəlakəti olduğunu vurğulayıb.
Ələkbərov, İsrailin Qəzzada sürətli və maneəsiz humanitar yardım çatdırılmasını təmin etmək öhdəliyində olduğunu qeyd edərək, BMT və tərəfdaşlarının bu yardımların bölgəyə çatdırılması üçün "sübut olunmuş və prinsiplərə əsaslanan" bir planının olduğunu bildirib.
O, Fələstin xalqına qarşı kollektiv cəzanın heç bir halda əsaslandırıla bilməyəcəyini, bu praktikanın dərhal dayandırılmalı olduğunu vurğulayıb. Eyni zamanda, Qəzzada və işğal olunmuş Fələstin ərazilərində əhalinin zorla köçürülməsi və etnik təmizləmə hallarını qəti şəkildə rədd etdiyini bəyan edib.
Ələkbərov həmçinin, İsrailin fələstinlilərə məxsus torpaqları zəbt etməsi və Qərb Şəriyyənin ilhaqını təşviq edən addımlarına da diqqət çəkib.
“İsrail məskənlərinin heç bir hüquqi qüvvəsi yoxdur və onlar beynəlxalq hüququn və BMT qətnamələrinin açıq şəkildə pozulmasıdır. Bu siyasət Fələstin dövlətinin ərazilərini sistemli şəkildə daraldır və İsrailin qanunsuz işğalını daha da dərinləşdirir.” - deyə Ələkbərov bildirib.
Ələkbərov sonda əlavə edib ki, İsrailin dağıdıcı hücumları, məcburi köçürmələr və gündəlik həyatı iflic edən məhdudiyyətləri fələstinlilər arasında ümidsizlik və narazılıq hissini artırır. O, bu tədbirlərin insan hüquqları pozuntusu olduğunu vurğulayaraq İsrailin beynəlxalq hüquqdan irəli gələn öhdəliklərini yerinə yetirməli olduğunu xatırladıb.
