Bakı, AzerVoice
Almaniya hökuməti, 2024-cü ilin dekabrın 17-nə qədər silah və
hərbi texnikanın ixracına təxminən 13,2 milyard avro dəyərində
icazə verib.
AzerVoice xəbər verir ki, Almaniyanın
İqtisadiyyat və İqlim Mühafizəsi Nazirliyinin hesabatına görə,
Almaniya hökuməti bu il xaricə təxminən 13,2 milyard avroluq silah
və hərbi texnikanın satışını təsdiqləyib.
Bu, Almaniyanın silah və hərbi texnika satışında rekord bir rəqəm
təşkil edir. 2023-cü ildəki satış həcmi isə 12,13 milyard avro
olub.
2024-cü ildə ən çox silah və hərbi texnika satışının baş verdiyi
ölkə, Ukrayna olub. Almaniya, Ukraynaya 8,1 milyard avro dəyərində
silah və texnika satışını təsdiqləyib.
Ukraynanı, Sinqapur (1,22 milyard avro), Əlcəzair (558 milyon
avro), ABŞ (298 milyon avro), Türkiyə (230 milyon avro) və
Hindistan (224 milyon avro) izləyib.
Bundan başqa, 2024-cü ildə Almaniyanın Təl-Əvivə silah və hərbi
texnika satışının 161 milyon avro olduğu bildirilir. Bu satış,
Beynəlxalq Ədalət Məhkəməsində, Nikaraquanın İsrailə silah tədarükü
ilə əlaqədar iddia qaldırması fonunda diqqət çəkib.
Qeyd edək ki, Almaniya, 2023-cü ildə İsrailə 327 milyon avro
dəyərində silah və hərbi texnika satışı təsdiqləmişdi, bu isə
2022-ci illə müqayisədə 10 dəfə artım deməkdir.
