Bakı, AzerVoice

Türkiyə Ticarət naziri Ömər Bolat və İranın Yollar və Şəhərsalma naziri Ferzane Sadık Ankara şəhərində Türkiyə-İran Qarışıq İqtisadi Komissiyasının (KEK) toplantısı çərçivəsində bir araya gəliblər.

AzerVoice xəbər verir ki, Nazir Ömər Bolat toplantıda İran nümayəndə heyətini qəbul etməkdən məmnunluğunu ifadə edərək, ötən ilin dekabrında Tehranda keçirilən 29-cu Türkiyə-İran KEK toplantısının uğurlu nəticələr verdiyini xatırladıb.

O bildirib ki, həmin görüş zamanı iki ölkə arasında ticarət, gömrük, kənd təsərrüfatı, investisiya, maliyyə, nəqliyyat və turizm sahələrini əhatə edən anlaşma memorandumu imzalanıb. Hər iki ölkə rəhbərliyi yaxın illərdə ticarət həcmini 30 milyard dollara çatdırmağı hədəfləyir.

Bolat, son bir ildə Türkiyə və İran arasında ikitərəfli ticarət həcminin əhəmiyyətli dərəcədə artdığını vurğulayıb.

Bolat, sərhəd keçidlərinin modernləşdirilməsi və tranzit dəhlizləri ilə bağlı əməkdaşlıqdan da danışıb. Vandakı Kapıköy Gömrük Qapısının modernləşdirilməsi və Sarısu Sərhəd Ticarət Mərkəzinin açılması üçün İran tərəfinin dəstəyinin vacib olduğunu qeyd edib.

İranlı nazir Ferzane Sadık isə iki ölkənin dostluq və qardaşlıq əlaqələrini vurğulayıb və 30 milyard dollarlıq ticarət həcminə çatmaq üçün əməkdaşlığın artırılmasının zəruri olduğunu bildirib. Sadık həmçinin nəqliyyat və tranzit dəhlizlərinin inkişafı ilə bağlı razılaşmaların yaxın aylarda konkret nəticələr verəcəyinə ümid etdiyini ifadə edib.