Bakı, AzerVoice
Trampın çox ağıllı biri olmasına baxmayaraq, etdiyi bu hərəkət çox axmaqcadır.
AzerVoice xəbər verir ki, bu sözləri Kanada Baş naziri Castin Trüdo deyib.
Trüdo Ottavada keçirilən mətbuat konfransı zamanı, ABŞ-ın Kanadaya tətbiq etdiyi 25 faizlik gömrük vergilərini sərt şəkildə tənqid edib.
Belə ki, Trüdo ABŞ-ın ən yaxın müttəfiqi olan Kanadaya qarşı ticarət müharibəsi başlatdığını bildirib.
Kanada Baş naziri, kanadalıların məntiqli və nəzakətli insanlar olduqlarını, lakin ölkənin rifahı təhlükəyə atıldığı təqdirdə geri çəkilməyəcəklərini qeyd edib.
ABŞ-ın 25 faizlik gömrük vergilərinə cavab olaraq, Kanada 155 milyard dollar dəyərində olan ABŞ mallarına eyni şəkildə vergi tətbiq edəcək. Trüdo, bu vergilərin 30 milyard dollarlıq mallara dərhal, qalan 125 milyard dollarlıq məhsullara isə 21 gün ərzində tətbiq olunacağını bildirib.
O, yeni gömrük tariflərinin amerikalıların iş yerlərini itirməsinə, market alış-verişindən tutmuş benzin, avtomobil və ev xərclərinə qədər hər şeyin bahalaşmasına səbəb olacağını vurğulayıb. Həmçinin ABŞ-ın tətbiq etdiyi tariflərin kanadalıları da ciddi şəkildə təsirləndirəcəyini qeyd edib.
