BAKI, AzerVoice
ABŞ Federal Aviasiya Administrasiyası (FAA) SpaceX-in Starship raketinin buraxılışı zamanı nəzarətdən çıxması səbəbindən Florida ştatında bəzi hava limanlarında uçuşları müvəqqəti olaraq dayandırıb.
AzerVoice xəbər verir ki, Orlando və Mayami hava limanlarında qısa müddətə uçuşlar təxirə salınıb, lakin daha sonra qadağa aradan qaldırılıb. Hadisə nəticəsində xəsarət alan və ya maddi ziyan qeydə alınmayıb.
SpaceX açıqlamasında pilotsuz raketin kosmosa qalxarkən "sürətli və planlaşdırılmamış parçalanmaya" məruz qaldığını və idarəetmədən çıxdığını bildirib. Bu, Starship-in səkkizinci sınaq uçuşu və ardıcıl ikinci uğursuz buraxılışı olub.
123 metr uzunluğundakı Starship raketi təxminən bir saat davam edəcək uçuşdan sonra Hind okeanı üzərində orbitə qayıtmağı planlaşdırırdı. Bununla belə, raketi yerdən qaldıran Super Heavy gücləndiricisi uğurla buraxılış meydançasına geri dönsə də, Starship özü orbitə çata bilməyib.
FAA bildirib ki, hava məkanının qısa müddətə bağlanması "kosmosa buraxılış hadisəsi" çərçivəsində təhlükəsizlik tədbiri olaraq həyata keçirilib.
SpaceX hadisənin səbəblərini araşdırmaq üçün məlumatları təhlil etdiyini bildirib. Şirkət vurğulayıb ki, "hər uğursuz sınaq yeni dərslər verir və Starship-in etibarlılığını artırmağa kömək edir."
Qeyd edək ki, bu, SpaceX-in Starship raketinin ilk uğursuz buraxılışı deyil. Yanvar ayında Texasdan buraxılan bir Starship raketi bir neçə dəqiqə sonra sıradan çıxmışdı. Həmin vaxt FAA dağıntılar səbəbindən hava məkanında məhdudiyyətlər tətbiq etmiş və Karib hövzəsində yerləşən Turks və Kaykos adalarında maddi ziyan qeydə alınmışdı.
