BAKI,AzerVoice

Bu gün Özbəkistanın Daşkənd şəhərində, Qırğızıstanın sədrliyi altında Şanxay Əməkdaşlıq Təşkilatının (ŞƏT) Regional Terrorizmlə Mübarizə Şurasının 43-cü iclası keçirildi.

AzerVoice xəbər verir ki, İclasda Belarus, Hindistan, İran, Qazaxıstan, Çin, Qırğızıstan, Pakistan, Rusiya, Tacikistan və Özbəkistanın hüquq-mühafizə orqanlarının nümayəndələri, ŞƏT-in Regional Terrorizmlə Mübarizə Şurasının İcraiyyə Komitəsinin üzvləri və ŞƏT-in baş katibi fəxri qonaq kimi iştirak ediblər.

Toplantı zamanı ŞƏT-in Regional Terrorizmlə Mübarizə Şurasının 2024-cü il üçün fəaliyyət hesabatı təqdim edildi və 2026-2030-cu illər üçün ekstremist ideologiyaya qarşı mübarizə üzrə əməkdaşlıq proqramı müzakirə olundu.

Şura tərəfindən təsdiqlənən əsas qərarlar:

• ŞƏT-in Regional Terrorizmlə Mübarizə Şurasının əvvəlki qərarlarının icrası ilə bağlı hesabatın qəbulu;
• 2022-2024-cü illər üçün terrorizmə, separatçılığa və ekstremizmə qarşı mübarizə proqramının həyata keçirilməsi ilə bağlı fəaliyyətlərin yekunlaşdırılması;
• İnternetin terrorçu, separatçı və ekstremist məqsədlərlə istifadəsinə qarşı birgə mübarizə tədbirlərinin davam etdirilməsi barədə razılıq əldə olunması.

Bundan əlavə, Qırğızıstanda ŞƏT-ə üzv ölkələrin sərhəd xidmət rəhbərlərinin XI toplantısının, Belarusda antiterror təlimlərinin və Özbəkistanda beynəlxalq terrorizm və ekstremizmə qarşı mübarizə üzrə elmi-praktiki konfransın keçirilməsi qərara alındı.

İclas zamanı ŞƏT-in Regional Terrorizmlə Mübarizə Şurasının İcraiyyə Komitəsinin təşkilati, kadr və maliyyə təminatı məsələləri müzakirə edildi.

Terrorizmlə mübarizədə xüsusi xidmətlərinə görə bəzi nümayəndələr fəxri diplom və xatirə nişanları ilə təltif olundu.

İclasın yekununda ŞƏT-in Regional Terrorizmlə Mübarizə Şurasının növbəti iclasının Qırğızıstanda keçirilməsi barədə razılıq əldə olundu.