Bakı, AzerVoice

İran prezidenti Məsud Pezeşkian iqtisadi problemlərin aradan qaldırılması və 8 faizlik artıma nail olmaq üçün 100 milyard dollar xarici investisiyaya ehtiyacın olduğunu açıqlayıb.

AzerVoice xəbər verir ki, Pezeşkiyan vəzifəyə gəldikdən sonra ilk televiziya müsahibəsində sanksiyaların İran iqtisadiyyatına vurduğu mənfi təsirindən şikayətlənib. O, administrasiyasının illik 40 faizi keçən inflyasiyanı azaltmağı planlaşdırdığını, lakin bunun beynəlxalq proseslərdən asılı olduğunu bildirib.

Pezeşkiyan çıxışında “Mütəxəssislər və iqtisadçılar deyirlər ki, İrana məqsədinə çatması üçün 250 milyard dollara qədər vəsait lazımdır… Ölkədə olan bütün pulumuz 100 milyard dolları keçmir, ona görə də 100 milyard dollar xarici investisiyaya ehtiyacımız var. Bu, bizim dünya, qonşularımız və xaricdəki iranlılarla olan əlaqələrimizə bağlıdır”,- deyə qeyd edib.

“Biz ABŞ və Avropadan ağır sanksiyalara məruz qalmışıq, lakin biz insanlarla mehriban davranmalıyıq”, deyən İran prezidenti sözlərinə davam edərək, “onların problemlərinin həllinin sanksiyalarla heç bir əlaqəsi yoxdur”,- deyə əlavə edib.