BAKI, AzerVoice
Kanadalı akademiklərə ABŞ-a səyahətlə bağlı xəbərdarlıq edilib.
AzerVoice xəbər verir ki, Kanada Universitet Müəllimləri Assosiasiyası (CAUT) ABŞ-da sürətlə dəyişən siyasi mühit və sərhəd keçidlərində yaranan çətinliklərlə əlaqədar akademiklərə “vacib olmayan” səfərlərdən çəkinməyi tövsiyə edib.
CAUT-un saytında yayımlanan bəyanatda qeyd olunub ki, ABŞ-a səyahət edən akademiklər elektron cihazlarında saxladıqları məlumatlara qarşı diqqətli olmalı və ehtiyac olduqda həssas informasiyaların qorunması üçün müvafiq tədbirlər görməlidirlər.
Assosiasiya bəzi şəxslərin, xüsusilə ABŞ administrasiyasına tənqidi yanaşan və ya tədqiqatları mövcud siyasətlə ziddiyyət təşkil edən akademiklərin daha diqqətli olmalarını tövsiyə edib.
CAUT hazırda 72.000-dən çox professor, tədqiqatçı və kitabxanaçını təmsil edir. Kanada mətbuatı ABŞ Gömrük və Sərhəd Mühafizəsinin məlumatlarına istinadla bildirib ki, bu ilin mart ayında Kanadadan ABŞ-a daxil olanların sayında ötən ilin eyni dövrü ilə müqayisədə 32 faiz azalma qeydə alınıb.
Qeyd edək ki, artan narahatlıqlar fonunda bu xəbərdarlıq akademik dairələrdə ciddi rezonansa səbəb olub və gələcək beynəlxalq elmi əməkdaşlıqlara mümkün təsirlər barədə suallar yaradıb.
