BAKI, AzerVoice
ABŞ dövlət katibi Marko Rubio, Hindistanın xarici işlər naziri Subramanyam Cayşankar və Pakistanın baş naziri Şahbaz Şərif ilə ayrı-ayrılıqda telefonla danışıb.
AzerVoice xəbər verir ki, bu barədə ABŞ Dövlət Departamentinin sözçüsü Temmi Bryusun verdiyi açıqlamada bildirilib.
Rubio, danışıqlar zamanı bölgədə artan gərginliklə bağlı tərəfləri dərhal eskalasiyanın azaldılmasına çağırıb və Vaşinqtonun Hindistan və Pakistan arasında birbaşa dialoqun tərəfində olduğunu bildirib.
Rubio ilə Cayşankar arasında baş tutan danışığın nəticəsinə dair sənəddə qeyd olunub ki, dövlət katibi ABŞ-ın Hindistanla terrorizmlə mübarizədə əməkdaşlığa sadiq olduğunu təsdiqləyib.
Rubio ilə Şahbaz Şərif arasında aparılan söhbətin nəticələrinə dair açıqlamada isə ABŞ dövlət katibinin Pakistanı terrorçu qruplaşmalara istənilən dəstəyin qarşısını almaq üçün konkret addımlar atmağa çağırdığı bildirilib.
