BAKI, AzerVoice
Somalinin paytaxtı Moqadişoda təxminən 10 saat davam edən güclü yağışlar dağıdıcı daşqınlara səbəb olub.
AzerVoice xəbər verir ki, bu barədə yerli mənbələr məlumat verib.
Məlumata görə, daşqınlar nəticəsində azı 7 nəfər həyatını itirib. Güclü yağışlar 200-dən çox ailənin evlərini tərk etməsinə səbəb olub. Moqadişonun müxtəlif məhəllələrində 9 ev tamamilə dağılıb, 6 əsas yol isə ciddi ziyan görüb.
“Moqadişoda bu qədər güclü yağışı heç vaxt görməmişdim. Yağışlar 10 saatdan çox davam etdi, məhəlləmizdə bir neçə ev uçdu və qonşuluqdakı evdə iki uşaq öldü” - deyə, 35 yaşlı Somali sakini bildirib.
Paytaxt Moqadişonun digər bir sakini isə bildirib ki, leysan nəticəsində bir çox insan evlərində məcburən qalıb və ciddi dağıntılar baş verib.
BMT-nin 30 aprel tarixində yaydığı hesabata əsasən, aprel ayının ortalarından bu yana Somalidə qəfil daşqınlardan 45 min nəfər zərər çəkib.
Qeyd edək ki, Somali 2023-cü ildə də güclü daşqınlarla üzləşmişdi. Həmin il “El-Ninyo” hava fenomeni ilə əlaqəli leysan yağışlar nəticəsində 100-dən çox insan ölmüş, 1 milyondan çox insan isə evsiz qalmışdı.
