BAKI, AzerVoice
ABŞ prezidenti Donald Tramp Yaxın Şərq səfərinə Səudiyyə Ərəbistanından başlayıb.
AzerVoice xəbər verir ki, ABŞ
prezidenti Donald Tramp ikinci prezidentlik müddətində Yaxın Şərqə
ilk böyük diplomatik səfərinə start verib.
Səfərin ilk dayanacağı Səudiyyə Ərəbistanıdır – bu ölkə, Trampın
2017-ci ildə də ilk xarici səfərinə başladığı və simvolik olaraq
Körfəz siyasətində prioritet mövqedə saxladığı məkandır.
Tramp bu səfər çərçivəsində həm regional münaqişələrin diplomatik həllinə töhfə verməyə, həm də iqtisadi və hərbi əlaqələri gücləndirməyə çalışacaq. ABŞ prezidentinin turnesi çərçivəsində Qətər və Birləşmiş Ərəb Əmirliklərinə də səfəri planlaşdırılıb. Bundan əlavə, Rusiya-Ukrayna münaqişəsi ilə bağlı İstanbulda keçirilə biləcək mümkün görüşlərdə iştirak ehtimalı da nəzərdən keçirilir.
Prezidentin Səudiyyəyə çatmasından dərhal sonra diqqət çəkən hadisə ABŞ-İsrail və HƏMAS arasında vasitəçiliklə azad edilən israilli girov Edan Aleksandrın Qırmızı Xaç təşkilatına təhvil verilməsi olub. Tramp bu hadisəni "böyük xəbər" adlandıraraq, "O, evinə - valideynlərinin yanına qayıdır. Bu, həqiqətən də gözəl bir xəbərdir. Onun öldüyünü düşünürdülər" - sözlərini işlədib.
Səfər çərçivəsində Trampın əsas gündəm mövzuları arasında Qəzzada davam edən müharibə, girovların taleyi, İranın nüvə proqramı və Yəməndəki husilərlə bağlı gərginliklər yer alır. ABŞ prezidenti qeyd edib ki, İranla nüvə məsələləri üzrə danışıqlarda "çox yaxşı şeylər baş verir". Lakin o, qətiyyətlə ,"İranın nüvə silahı ola bilməz" - deyə vurğulayıb.
Trampın bu səfəri həm də onun İsrail ilə münasibətlərindəki son gərginliklərin fonunda baş tutur. ABŞ prezidenti İsrailin Qəzzadakı hərbi əməliyyatlarını tənqid etməsə də, Baş nazir Binyamin Netanyahu ilə İran və husilərə qarşı strategiyalar məsələsində fikir ayrılığı yaşadığı bildirilir.
Digər mühüm məqam isə Trampın bu dəfə İsraili tur marşrutuna daxil etməməsidir. Ekspertlər bunu, onun prioritetlərini Körfəz ölkələrinə yönəltməsi və Vaşinqtonun bölgədə dəyişən geosiyasi balansı nəzərə alaraq yeni strategiya tətbiq etməsi kimi qiymətləndirirlər.
Səfər zamanı Trampın Qətər vasitəsilə atəşkəs danışıqlarının canlandırılması və daha çox girovun azad edilməsi üçün yeni təşəbbüslər irəli sürəcəyi gözlənilir. HƏMAS da ABŞ prezidentindən diplomatik səylərin davam etdirilməsini istəyib.
ABŞ lideri, eyni zamanda, Rusiya və Ukrayna arasında danışıqların İstanbulda keçirilməsi ehtimalını da nəzərə alaraq planlarını dəyişə biləcəyini bildirib. “Əgər həmin vaxt bu, faydalı olacaqsa, mən orada olacağam”, – deyə o qeyd edib. Tramp həm Vladimir Zelenski, həm də Vladimir Putinin danışıqlarda iştirak edə biləcəyini ehtimal etdiyini deyib.
Qeyd edək ki, Trampın bu səfəri onun ikinci müddətində beynəlxalq siyasətdəki ilk genişmiqyaslı addımlarından biri kimi qiymətləndirilir. Onun Körfəz ölkələrinə olan marağı, həm ABŞ-ın enerji və təhlükəsizlik maraqlarını, həm də strateji ticarət əlaqələrini yenidən qurmaq niyyətini ortaya qoyur.
