BAKI, AzerVoice

İngiltərə, Fransa və Kanada İsrailə xəbərdarlıq edərək, Qəzzaya hərbi əməliyyatları dayandırmazsa, daha sərt addımlar atacaqlarını bildiriblər.

AzerVoice xəbər verir ki, üç ölkənin yayımladığı birgə bəyanatda İsrailin Qəzzada hücumlarını genişləndirməsi kəskin şəkildə tənqid olunub və bu hərəkətlərin vəhşilik olduğu vurğulanıb.

Bəyanatda, eyni zamanda, İsrail hökumət üzvlərinin Qəzzadakı əhali ilə bağlı istifadə etdiyi "nifrət dolu dil" qınanıb və belə ifadələrin qəbuledilməz olduğu bildirilib.

“Netanyahu hökumətinin dəhşətli hərəkətlərini seyr edə bilmərik. Əgər hərbi əməliyyatlar dayandırılmaz və humanitar yardımın qarşısındakı maneələr aradan qaldırılmazsa, daha konkret addımlar atacağıq”. - deyə bəyanatda qeyd edilib.

Qeyd edək ki, Qəzza zolağında 2023-cü ilin oktyabrından bu yana davam edən hücumlar nəticəsində on minlərlə fələstinli həyatını itirib. Beynəlxalq ictimaiyyət isə İsrailin bu hərbi əməliyyatlarına qarşı artan şəkildə narahatlığını ifadə edir.