BAKI, AzerVoice
Malta yaxın zamanda Fələstini rəsmi olaraq dövlət kimi tanıyacaq.
AzerVoice xəbər verir ki, bu barədə Maltanın Baş naziri Robert Abela bildirib.
Abela bu bəyanatı Mosta şəhərində keçirilən siyasi tədbirdə çıxışı zamanı səsləndirib. Baş nazir vurğulayıb ki, Malta Qəzza zolağında baş verən faciəyə göz yuma bilməz.
“Ola bilsin ki, ölkəmizdə Fələstinin dövlət kimi tanınması ilə bağlı 45 ildir müzakirələr aparılır, amma məhz mənim rəhbərlik etdiyim hökumət Fələstin dövlətini tanıyacaq” – deyə, Abela bəyan edib.
O, tanınma üçün konkret tarix açıqlamasa da, bu prosesin iyunun 20-də keçiriləcək BMT konfransından sonra baş tutacağını qeyd edib.
Xatırladaq ki, ötən il Yaxın Şərqdə vəziyyətin kəskinləşməsi fonunda İrlandiya, İspaniya və Norveç Fələstini dövlət kimi tanıdıqlarını elan etmişdilər. Ümumilikdə, BMT-yə üzv olan 148 ölkə Fələstin Dövlətini tanıyıb. 95 ölkədə Fələstinin səfirlikləri və daimi nümayəndəlikləri fəaliyyət göstərir.
