BAKI, AzerVoice

ABŞ Prezidenti Donald Tramp bəyan edib ki, ötən həftə İsrailin Baş naziri Binyamin Netanyahu ilə telefon danışığı zamanı onu Tehranın nüvə proqramı üzrə Vaşinqtonla aparılan danışıqları poza biləcək hər hansı hərbi addımlardan çəkindirib.

AzerVoice xəbər verir ki, bu barədə Tramp Ağ Evdə jurnalistlərin suallarını cavablandırarkən bildirib.

Tramp jurnalistlərin “Netanyahuya belə bir xəbərdarlıq etdinizmi?” sualına cavab olaraq bildirib: “Dürüst olmaq istəyirəm. Bəli, bu doğrudur.”

“Mən Netanyahuya dedim ki, bu mərhələdə onun addımı yerində deyil. Çünki biz çox etibarlı bir sənəd əsasında problemi həll edə bilərik. Etibarlı o deməkdir ki, yoxlamalarla və inamsız. Mən heç kimə inanmıram, ona görə də heç bir etimad yoxdur. Sənəd elə olmalıdır ki, istədiyimiz vaxt oraya müfəttiş göndərə bilək. İstədiyimizi yoxlaya, lazım gəlsə laboratoriyanı partlada bilək, amma heç kim ölməsin. Partladılan yerdə adam olmasın. Mən ona dedim ki, indi bu cür hərəkətlər üçün uyğun zaman deyil. Çünki biz razılaşmaya çox yaxınıq və bu istənilən an dəyişə bilər. Hər şey bir telefon zəngi ilə dəyişə bilər. Amma mən düşünürəm ki, İran indi bu razılaşmanı bağlamaq istəyir. Əgər bu baş tutsa, biz çoxlu həyatları xilas edəcəyik” - Tramp əlavə edib.

Xatırladaq ki, ABŞ və İran nümayəndə heyətləri mayın 23-də Romada İranın nüvə proqramı ətrafında yaranmış böhranın nizamlanması üçün danışıqların beşinci raundunu aparıblar. Danışıqlarda Oman vasitəçi ölkə qismində çıxış edib. Oman xarici işlər naziri Bədr əl-Busaidi danışıqlardan sonra "müəyyən, lakin yekunlaşmamış irəliləyiş" əldə olunduğunu bəyan edib.

İranın nümayəndə heyətinin rəhbəri Seyid Abbas Araqçi isə bildirib ki, Tehran və Vaşinqton bir-iki görüşlə müsbət nəticənin əldə olunacağına ümid edir.

ABŞ Dövlət Departamentinin mətbuat xidmətinin rəhbəri Temmi Bryus isə çərşənbə axşamı keçirilən brifinqdə görüşün konstruktiv xarakter daşıdığını və tərəflərin yaxın zamanda yenidən görüşmək barədə razılığa gəldiklərini bildirib.