BAKI, AzerVoice

ABŞ prezidenti Donald Tramp və Tesla şirkətinin baş direktoru İlon Mask arasında vergi endirimi qanun layihəsi ilə bağlı yaranan gərginlik elektrikli avtomobil istehsalçısının səhmlərinə mənfi təsir göstərib.

AzerVoicexəbər verir ki, Tesla-nın səhmləri 10 faizdən çox dəyər itirərək 298,38 dollara qədər geriləyib.

Trampın “böyük gözəl qanun layihəsi” adlandırdığı vergi təşviqləri paketi Mask tərəfindən kəskin şəkildə tənqid olunub. Tesla rəhbəri X sosial media platformasında yayımladığı açıqlamada qanun layihəsini “biabırçılıq” adlandırıb və “Üzr istəyirəm, amma daha buna dözə bilmirəm” sözləri ilə münasibətini sərt şəkildə ifadə edib.

Bir zamanlar dost münasibətlərində olduqları deyilən Tramp və Mask arasında münasibətlər son günlərdə açıq qarşıdurmaya çevrilib. Tramp Ağ Evdə Almaniya kansleri Fridrix Mersi ilə görüşü zamanı bu məsələ ilə bağlı ilk dəfə mövqe bildirərək, “Elonla əvvəllər yaxşı münasibətimiz var idi. Ona çox kömək etmişəm, amma artıq bu münasibətin davam etdiyini düşünmürəm. Elona görə məyus oldum” - deyə qeyd edib.

Tramp, Maskın reaksiya göstərməsinin səbəbi kimi elektrikli avtomobillərə verilən təşviq endirimlərinin ləğvini göstərib və, “Mask əvvəldən bu təşviqlərin ləğv olunacağını bilirdi.” - deyə əlavə edib.

Trampın açıqlamalarına cavab olaraq Elon Mask X platformasında növbəti paylaşımında “Bu qanun layihəsi mənə heç vaxt göstərilməyib. O qədər sürətlə qəbul olundu ki, Konqres üzvlərinin əksəriyyəti onu oxuya bilmədi.” - deyə qeyd edib.

Mask həmçinin Trampın “onun dəstəyi olmadan qalib gələ biləcəyi” ilə bağlı sözlərini də təkzib edərək, “Əgər mən olmasaydım, Tramp seçkiləri uduzardı. Demokratlar Nümayəndələr Palatasına nəzarəti ələ keçirər, Respublikaçılar isə Senatda cəmi 51-49 üstünlük əldə edərdi,” – deyə bildirib.

Bu qarşıdurmanın yaxın günlərdə daha da kəskinləşəcəyi və həm siyasi, həm də maliyyə bazarlarında təsirinin davam edəcəyi gözlənilir.