BAKI, AzerVoice
Kaliforniya Milli Qvardiyası Los-Ancelesdəki etiraz aksiyaları ilə əlaqədar ictimai asayişi təmin etmək üçün şəhərə gəlməyə başlayıb.
AzerVoice xəbər verir ki, bu barədə ABC telekanalı məlumat verib.
Məlumatda qeyd olunur ki, yerli vaxtla saat 04:00 radələrində Milli Qvardiya əsgərləri və texnikası şəhər administrasiyası yaxınlığında müşahidə edilib. Onlar Los-Ancelesdə qeyri-qanuni miqrantların kütləvi həbsləri səbəbilə baş verən iğtişaşların qarşısını almaq üçün yerləşdiriliblər.
Bundan əvvəl Los-Anceles meri Karen Bass bəyan etmişdi ki, ABŞ prezidenti Donald Trampın sözlərinin əksinə olaraq, şəhərdə Milli Qvardiya yerləşdirilməyib. Tramp isə daha əvvəl Los-Ancelesə 2 min nəfərlik Milli Qvardiya qüvvəsinin göndərilməsini əmr etmiş və onların "şəhərdə iğtişaşların yatırılmasında əla iş gördüyünü" bildirmişdi. The New York Times qəzetinin yazdığına görə, Tramp bu qərarı Kaliforniya qubernatoru Kevin Nyusomun razılığı olmadan verib. Bu, ABŞ tarixində 1965-ci ildən bəri ilk dəfədir ki, prezident qubernatorun müraciəti olmadan ştatın Milli Qvardiyasını işə cəlb edir.
Ağ Evin aparat rəhbərinin müavini Stiven Miller Kaliforniyada keçirilən nümayişləri üsyan adlandırıb və Los-Anceles polis idarəsinin rəhbərinin "miqrantların kütləvi deportasiyalarında iştirak etməyəcəkləri" bəyanatını tənqid edib. Tramp isə "Truth Social" platformasında bildirib ki, əgər Kaliforniya qubernatoru və Los-Anceles meri vəziyyəti nəzarət altına ala bilməsə, federal hökumət "üsyançılar və talançılarla mübarizə aparmaq üçün müdaxilə etməyə məcbur qalacaq"
