BAKI,VOA,Yusif Şərifzadə
ABŞ-nin texnologiya şirkəti "Apple" süni intellekt sahəsində fəaliyyət göstərən "OpenAI" şirkətinə və şirkətin iki keçmiş əməkdaşına qarşı məhkəmə iddiası qaldırıb. Şirkət onları "Apple"a məxsus kommersiya sirlərinin qanunsuz əldə olunaraq istehlakçı avadanlıqları sahəsində istifadə edilməsində ittiham edir.
VOA xəbər verir ki, Kaliforniya Ştatının Şimal Dairəsi üzrə federal məhkəməsinə təqdim edilən iddia ərizəsində "Apple" "OpenAI"ni keçmiş əməkdaşlar, işə qəbul prosesi və təchizatçılar vasitəsilə məxfi məlumatları sistemli şəkildə toplamaqda günahlandırır. Şirkətin iddiasına görə, məqsəd "OpenAI"nin istehlakçı avadanlıqları bazarına daxil olmasını sürətləndirmək olub.
"OpenAI" isə ittihamları rədd edib. Şirkət yaydığı açıqlamada digər şirkətlərin kommersiya sirləri ilə maraqlanmadığını və bütün diqqətini insanların imkanlarını genişləndirən yenilikçi texnologiyaların hazırlanmasına yönəltdiyini bildirib.
Mütəxəssislərin fikrincə, məhkəmə çəkişməsi gələcəkdə ənənəvi tətbiqlər və əməliyyat sistemlərindən fərqli işləyən süni intellekt əsaslı qurğular bazarında rəqabəti daha da gücləndirə bilər. Bildirilir ki, "OpenAI" öz istehlakçı qurğusunu, o cümlədən ağıllı telefon hazırlamaq üzərində işləyir.
Təhlilçilər hesab edirlər ki, süni intellekt sahəsində artan rəqabət iki şirkət arasında münasibətləri gərginləşdirib. Onların fikrincə, "Apple" "OpenAI"ni artıq tərəfdaşdan potensial rəqibə çevrilən şirkət kimi görür, "OpenAI" isə "iPhone"dan asılılığını azaltmağa və istifadəçilərlə birbaşa əlaqə qurmağa çalışır.
Məhkəmə iddiasında "Apple"ın iki keçmiş əməkdaşı – keçmiş baş sistem elektrik mühəndisi Çan Lyu və "iPhone" və "Apple Watch" məhsullarının keçmiş vitse-prezidenti Tan Yev Tan da cavabdeh qismində göstərilib. Onlar hələlik məsələ ilə bağlı açıqlama verməyiblər.
