BAKI, AzerVoice
Britaniya kəşfiyyatına ilk dəfə qadın rəhbər təyin olunub.
AzerVoice xəbər verir ki, Böyük
Britaniyanın baş naziri Keir Starmerin təsdiqi ilə ölkənin xarici
kəşfiyyat xidməti MI6-ya (Secret Intelligence Service) ilk dəfə
qadın rəhbər təyin edilib.
Bu vəzifəyə Blez Metreweli gətirilib.
Baş nazirliyin 10 saylı ofisindən yayılan açıqlamada Metrewelinin MI6-nın 18-ci rəhbəri olduğu, təşkilatda daha əvvəl texnologiya və innovasiyaya cavabdeh “Q” direktoru vəzifəsində çalışdığı bildirilib. O, eyni zamanda ölkənin daxili təhlükəsizlik xidməti MI5-də də fəaliyyət göstərib.
Hazırda MI6-nın rəhbəri olan və vaxtilə Britaniyanın Ankaradakı səfiri kimi tanınan Riçard Mur bu ilin payızında vəzifəsini təhvil verəcək. Kembric Universitetində antropologiya təhsili alan Metreweli 1999-cu ildən MI6-da çalışır və karyerasının böyük hissəsini Yaxın Şərq və Avropadakı əməliyyatlarla keçirib.
“Böyük Britaniya görünməmiş təhlükələrlə üz-üzədir. Casus gəmilərdən tutmuş dövlət xidmətlərini hədəfləyən kiber hücumlara qədər çoxsaylı təhlükələrlə qarşılaşırıq.” - deyə Baş nazir Starmer təyinatı tarixi hadisə adlandıraraq qeyd edib.
Xarici işlər naziri David Lammy isə bildirib ki, texnologiyanın artan rolu və qlobal qeyri-sabitlik fonunda Metrewelinin rəhbərliyi ölkənin təhlükəsizliyinə töhfə verəcək. O əlavə edib ki, kəşfiyyat orqanlarına əlavə 600 milyon funt-sterlinq büdcə ayrılıb.
Qeyd edək ki, Blez Metrewelinin MI6 rəhbəri təyin olunması həm də gender bərabərliyi baxımından tarixi addım hesab olunur.
