BAKI, AzerVoice
ABŞ-ın B-2 bombardmançıları İrana müdaxilə edəcəkmi?
AzerVoice xəbər verir ki, İsraillə
İran arasında müharibənin ilk həftəsi tamamlanarkən, tərəflər
qarşılıqlı hücumlarını davam etdirir.
İran ballistik və qanadlı raketlərlə İsraili hədəfə alır, İsrail
isə ABŞ tanker təyyarələrinin dəstəyi ilə F-35 qırıcıları
vasitəsilə İranın bir çox şəhərinə hücumlar həyata keçirir.
İsrailin əsas hədəflərindən biri kimi göstərilən Qum yaxınlığındakı Fordo nüvə obyektinin məhv edilməsi üçün İsrailin hazırda kifayət qədər dərinlikdə zərbə endirə biləcək silah sisteminə malik olmadığı bildirilir. Mütəxəssislər qeyd edir ki, bu obyektə yalnız ABŞ istehsalı olan və 60 metrdən çox dərinliyə nüfuz edə bilən GBU-57/B “Massive Ordnance Penetrator” (MOP) adlı xüsusi bombalarla zərbə endirmək mümkündür. Həmin bombalar isə yalnız Amerikanın “görünməz” kimi tanınan B-2 Spirit strateji bombardmançı təyyarələri tərəfindən daşına bilir.
Məsələ ilə bağlı ABŞ mediasında yayılan məlumatlara görə, Prezident Donald Tramp Milli Təhlükəsizlik Şurası ilə toplantı keçirib və İrana birbaşa hücum məsələsinin də gündəmdə olduğu bildirilib. “Wall Street Journal” qəzetinin məlumatına əsasən, hələlik İrana zərbə endirilib-endirilməyəcəyi ilə bağlı yekun qərar verilməyib.
Tramp isə jurnalistlərin bu yöndəki suallarını cavablandırarkən, “Münaqişəyə qarışmaq istəmirəm. İranlılar görüşmək istəyirlər, amma artıq çox gecdir. Biz atəşkəs deyil, qələbə istəyirik,” – deyə açıqlama verib. O, həmçinin İsrailin hazırkı mərhələdə müharibədə üstünlük qazandığını vurğulayıb.
Fordo obyekti yerin 80-90 metr dərinliyində yerləşdiyindən, “bunker buster” kimi tanınan GBU-57/B bombalarının tətbiqi vacib hesab olunur. Bu bombalar sərt yer qatlarını və dəmir-beton konstruksiyaları dağıtmaq üçün dizayn edilib və yalnız B-2 bombardmançıları ilə daşına bilər.
Hazırda ABŞ-ın Hind Okeanındakı Dieqo Qarsiya hərbi bazasında ən azı 3 B-2 təyyarəsi yerləşdirilib. İranın ən uzun mənzilli raketlərinin çatmadığı bu ərazidən B-2-lərin Fordoya yönəlik əməliyyatı mümkün görünür.
Qeyd edək ki, B-2 bombardmançıları daha əvvəl Kosovoda və Əfqanıstanda istifadə olunub. Onların yüksək mənzilli uçuş qabiliyyəti və radarlar tərəfindən aşkar olunmaması bu təyyarələri xüsusi strateji hədəflər üçün əvəzolunmaz edir.
