BAKI, AzerVoice
ABŞ Prezidenti Donald Tramp, İran və İsrail arasında atəşkəsin elan olunmasından əvvəl İsrailin baş naziri Benyamin Netanyahuyla telefon danışığı apararaq bütün hərbi əməliyyatların dərhal dayandırılmasını tələb edib.
AzerVoice xəbər verir ki, bu barədə "NBC News" telekanalı Ağ Evdəki yüksək rütbəli məmura istinadla məlumat verib.
Məlumata görə, Tramp bu tələbi İranın artıq “xeyli zəiflədiyini” əsas gətirərək irəli sürüb.
“Artıq müharibə yoxdur, döyüş yoxdur. İranlılar kifayət qədər zəifləyib” - deyə, mənbə Trampın sözlərinə istinad edib.
Bununla paralel olaraq, ABŞ prezidentinin milli təhlükəsizlik komandası da vasitəçilər üzərindən İrana mesajlar göndərərək İsrailə qarşı hücumlardan imtina etməyi və atəşkəsə razılıq verməyi tələb edib. Təbliğat işləri çərçivəsində Tramp Qətər əmiri Şeyx Təmim bin Hamed Al Taniyə də zəng edərək Tehrana təsir göstərmək və razılaşmaya vasitəçilik etmək xahişində bulunub. NBC News-un məlumatına görə, Tramp hər iki tərəfi atəşkəsin zəruriliyinə inandıra bilib.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Həqiqi vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
İyunun 24-də ABŞ Prezidenti Donald Tramp İsrail və İran arasında müvəqqəti atəşkəs elan edib.
Trampın sözlərinə görə, əvvəlcə – razılaşmanın qüvvəyə minməsindən 6 saat sonra – İran hücumlarını dayandıracaq, 12-ci saatda isə İsrail. 24 saatdan sonra isə bütün dünya “12 günlük müharibənin” rəsmi olaraq bitməsini qeyd edəcək.
İranın dövlət televiziyası da İsrail və İran arasında atəşkəsin başladığını bildirmişdi.
“Sionist rejimlə atəşkəs İranın işğal altındakı ərazilərə qarşı dörd mərhələdən ibarət zərbələrindən sonra qüvvəyə minib” – deyə, kanal X sosial şəbəkəsində qeyd edib.
