BAKI, AzerVoice

Ukrayna prezidenti Volodimir Zelenski, Təhlükəsizlik və Müdafiə Şurasının ölkənin Ottava Konvensiyasından çıxması ilə bağlı qərarını təsdiqləyən fərman imzalayıb.

AzerVoice xəbər verir ki, bu barədə Ali Radanın deputatı Roman Kostenko "Facebook" sosial şəbəkə hesabında məlumat verib.

“Mənə bir az əvvəl məlumat verdilər ki, Zelenski Təhlükəsizlik və Müdafiə Şurasının ölkəmizin Ottava konvensiyasından çıxması ilə bağlı fərman imzalayıb. Bu konvensiya piyada əleyhinə minaların istifadəsini, toplanmasını və istehsalını qadağan edən beynəlxalq müqavilədir” - deyə, məlumatda bildirilib.

Kostenkonun sözlərinə görə, bundan sonra məsələ Ali Radada müzakirəyə çıxarılacaq. Hələlik Zelenskinin rəsmi saytında fərmanın mətni dərc olunmayıb.

Qeyd edək ki, bundan əvvəl Ottava Konvensiyasından çıxacaqlarını Finlandiya, Estoniya, Latviya, Litva və Polşa da bəyan ediblər.