Tramp İranın gizli nüvə obyektinə sahib oldğunu etiraf edib

ABŞ prezidenti Donald Tramp, İranın gizli nüvə obyektinə sahib olduğunu faktiki olaraq etiraf edib.

AzerVoice xəbər verir ki, bu barədə Tramp "Fox News" telekanalına verdiyi müsahibədə danışıb.

“Biz bilirdik ki, İranda bir çox nüvə obyekti var, ehtimal ki, üç əsas obyekt və üstəlik daha bir əlavə obyekt” - deyə, Tramp bildirib.

Bununla yanaşı, Tramp vurğulayıb ki, ABŞ-ın hava hücumlarından əvvəl Tehranın zənginləşdirilmiş uranı bu obyektlərdən çıxara bildiyini düşünmür.

“Xeyr. Birincisi, bunu etmək çox çətindir. Bu, olduqca təhlükəlidir. Üstəlik, heç kim bizim Fordodakı obyektə zərbə endirəcəyimizi düşünmürdü, çünki hamı deyirdi ki, ora keçilməzdir. Məncə, orada insanlar var idi, deyirlər ki, avtomobillər də olub. Bu insanlar giriş hissəsini betonlamağa çalışırdılar, yəqin ki, bomba məhz ora düşəcəkdi” – deyə, Tramp qeyd edib.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.

ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.

İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.