BAKI, AzerVoice
ABŞ Konqresinin Senatı, prezident Donald Tramp administrasiyasının təşəbbüsü ilə hazırlanan, vergilərin azaldılmasını və dövlət borcunun yuxarı həddinin artırılmasını nəzərdə tutan qanun layihəsini qəbul edib.
AzerVoice xəbər verir ki, səsvermə C-SPAN telekanalı vasitəsilə yayımlanıb.
Qanun layihəsi Senatda 50 lehinə, 50 əleyhinə səslə qarşılanıb. Bərabər səslər səbəbilə ABŞ vitse-prezidenti (Konstitusiyaya əsasən Senatın sədri) Cey Di Vens həlledici səs hüququndan istifadə edərək layihənin qəbul edilməsini təmin edib.
Donald Trampın “vahid, böyük və möhtəşəm qanun layihəsi” adlandırdığı sənəd bəzi sahələrdə vergilərin və dövlət xərclərinin əhəmiyyətli dərəcədə azaldılmasını nəzərdə tutur. Bununla yanaşı, müdafiə sahəsinə, xüsusilə “Golden Dome” (Qızıl Günbəz) adlı yeni raketdən müdafiə sistemi layihəsinə ayrılan xərclərin artırılması planlaşdırılır. Eyni zamanda, sərhəd nəzarətinin gücləndirilməsi və bu sahəyə ayrılan vəsaitin artırılması da sənədə daxil edilib.
Amerikalı iş adamı və keçmişdə hökumətin səmərəliliyinin artırılması üzrə qurumunun (DOGE) koordinatoru olmuş İlon Mask bu qanun layihəsini dəfələrlə sərt şəkildə tənqid edib. O, xüsusilə dövlət borcunun yuxarı həddinin 5 trilyon dollar artırılmasına qarşı çıxıb. Hal-hazırda ABŞ-ın ümumi dövlət borcu 36 trilyon dolları ötür. Mask bildirib ki, sənədi dəstəkləyən respublikaçı qanunvericilərə qarşı növbəti il keçiriləcək aralıq seçkilərdə onların rəqiblərinə dəstək verməyə hazırdır.
ABŞ Konqresinin Büdcə İdarəsinin iyun ayının əvvəlində verdiyi qiymətləndirməyə əsasən, qanun layihəsində nəzərdə tutulan tədbirlərin həyata keçirilməsi qarşıdakı on il ərzində büdcə kəsirini 2,4 trilyon dollar artıracaq. Eyni zamanda, bu müddət ərzində büdcə gəlirlərinin 3,6 trilyon dollar azalacağı, xərclərin isə 1,2 trilyon dollar azaldılacağı proqnozlaşdırılır.
Mayın 22-də Konqresin Nümayəndələr Palatası bu qanun layihəsinin öz versiyasını təsdiqləmişdi. İndi Palata, Senat tərəfindən qəbul edilmiş yeni versiyanı nəzərdən keçirməlidir. Hazırda hər iki palatada çoxluğa sahib olan Respublikaçılar sənədin iulun 4-ə qədər tam təsdiqini təmin etməyi hədəflədiklərini bəyan ediblər.
