BAKI, AzerVoice
Polşanın Xarici İşlər Nazirliyi, Ukraynanın paytaxtı Kiyevdəki səfirliyinin konsulluq bölməsinin Rusiya ordusunun təşkil etdiyi hava hücumunda ziyan görməsi ilə əlaqədar olaraq Rusiya tərəfinə nota verib.
AzerVoice xəbər verir ki, bu barədə Polşa XİN rəhbəri Radoslav Sikorski, sosial şəbəkə hesabında yazıb.
Nazir, Polşanın Kiyevdəki səfirliyinin konsulluq bölməsinin zərər gördüyünü xatırladıb və ABŞ Prezidenti Donald Trampdan Ukraynaya hava hücumundan müdafiə (HHM) sistemlərinin göndərilməsinin bərpa edilməsini tələb edib.
"Prezident Tramp, [Rusiya Preazidenti Vladimir] Putin sizin sülh səylərinizlə lağ edir. Zəhmət olmasa, Ukraynaya hava hücumundan müdafiə sistemlərinin göndərilməsini yenidən başladın və təcavüzkara (Rusiya nəzərdə tutulur - red.) qarşı yeni sərt sanksiyalar tətbiq edin" - deyə, o bildirib.
Bundan əlavə, açıqlamada notanın Rusiyanın Varşavadakı Səfirliyinə təqdim edildiyi bildirilib.
Nazirlik, hücumun beynəlxalq hüququ, xüsusilə də 1961-ci il tarixli Vyana Konvensiyasını pozduğunu vurğulayıb.
Bundan əvvəl, Ukrayna Silahlı Qüvvələri, Rusiyanın Kiyevə 539 pilotsuz uçuş aparatı (PUA) və 11 raketlə hücum etdiyini açıqlamışdı.
