BAKI, AzerVoice
YUNESKO-nun Ümumdünya İrs Siyahısına üç yeni Afrika ərazisi daxil edilib.
AzerVoice xəbər verir ki, Fransanın
paytaxtı Parisdə keçirilən 47-ci Genişləndirilmiş Ümumdünya İrs
Komitəsinin iclasında Afrikaya məxsus üç yeni ərazi YUNESKO-nun
Ümumdünya İrs Siyahısına daxil edilib.
Eyni zamanda, “Təhlükədə olan Ümumdünya İrs” siyahısından üç ərazi
çıxarılıb.
Yeni daxil edilən ərazilər arasında Malavidə yerləşən və müqəddəs ruhların məskəni hesab edilən Mulanje dağı, Kamerunun Mandara dağlarındakı Diy-Gid-Biy mədəni mənzərəsi və Qvineya-Bisau sahillərində yerləşən Bijaqos arxipelaqı yer alır. Xüsusilə Bijaqos arxipelaqı Qvineya-Bisaudan bu siyahıya daxil edilən ilk arxipelaq kimi tarixi əhəmiyyət daşıyır.
Bijaqos arxipelaqında animist inancların və qadın liderliyinin əsas yer tutduğu matriarxal Bijagos icması yaşayır. Arxipelaqda 30 minə yaxın insan və 870 mindən çox köçəri quş məskunlaşıb.
Digər tərəfdən, Təhlükədə olan irs kateroqiyasından çıxarılan yerlər sırasına Madaqaskardakı Atsinanana yağış meşələri, Misirin Əbu Mena bölgəsi və Liviyanın qədim Qadames şəhəri daxildir.
Qeyd edək ki, dünya üzrə Ümumdünya İrs Siyahısında olan ərazilərin cəmi 9 faizi Afrikaya aiddir. Bununla belə, qitə “təhlükədə olan irs” kateqoriyasına daxil edilən sahələrin dörddə birini təşkil edir.
