BAKI, AzerVoice

Filippinə hərbi gəmi ixracı regional sabitliyə ziddir.

AzerVoice xəbər verir ki, Çin Müdafiə Nazirliyi Yaponiyanı regional sülh və sabitliyi qorumağa çağırıb.

Bu bəyanat Tokionun Filippinə hərbi gəmi ixrac edəcəyi ilə bağlı yayılan xəbərlərdən sonra verilib.

Yaponiyanın yerli mediasında yayılan məlumatlara görə, Tokio hökuməti Filippinə altı ədəd Abukuma sinifli dəniz patrul gəmisinin ixracını planlaşdırır. Bununla bağlı açıqlama verən Çin Müdafiə Nazirliyinin sözçüsü Jiang Bin bildirib ki, rəsmi Tokio keçmişdən dərs almalı, hərbi və təhlükəsizlik sahəsində atdığı addımlarda ehtiyatlı davranmalıdır.

“Yaponiya regionda sülh və sabitliyin qorunması üçün əlavə addımlar atmalıdır. Müdafiə və təhlükəsizlik sahəsində əməkdaşlıq heç bir üçüncü tərəfin maraqlarını hədəf almamalı və bölgədə gərginliyi artırmamalıdır.” - deyə o bildirib.

Çin tərəfi bu kontekstdə Cənubi Çin dənizində davam edən geosiyasi gərginliyi xatırladaraq, bölgədəki sabitliyi təhlükəyə atacaq istənilən təşəbbüsə qarşı çıxacağını vurğulayıb.

Qeyd edək ki, Yaponiyanın Filippinlə son dövrlərdə güclənən hərbi əlaqələri Pekin tərəfindən narahatlıqla qarşılanır. Rəsmi Tokyo isə regional təhlükəsizliyə töhfə verdiyini iddia edir.