BAKI, AzerVoice
Avropa İttifaqı (Aİ) ABŞ-ın avqustun 1-dən etibarən Aİ-dən ixrac olunan bütün məhsullara 30 faizlik idxal rüsumu tətbiq etməsinə cavab olaraq, ABŞ mallarına qarşı tariflərin ikinci siyahısını hazırlayıb.
AzerVoice "Bloomberg" agentliyinə istinadən xəbər verir ki, bu siyahıya Amerika avtomobilləri, "Boeing" təyyarələri və burbon (ABŞ-da istehsal olunan spirtli içki) da daxildir.
Avropa Komissiyasının sənədi 72 milyard avroluq ABŞ məhsullarına qarşı yeni rüsumları nəzərdə tutur.
Siyahıda mühəndislik məhsulları, kimyəvi maddələr, plastiklər, tibbi cihazlar, elektrik avadanlıqları, şərab və digər kənd təsərrüfatı malları yer alır. İdxal edilən hərbi məhsullar isə rüsumlardan azad olunacaq.
Bildirilib ki, ilkin siyahı 95 milyard avro həcmində idi, lakin Avropa şirkətləri və üzv dövlətlərlə aparılan məsləhətləşmələrdən sonra bu məbləğ azaldılıb. Məhsulların seçimində əsas meyar onların alternativ təchizat imkanlarının olması və yüksək nəqliyyat xərcləri olub.
Qeyd edək ki, bu, Avropa İttifaqının ABŞ-a qarşı hazırladığı ikinci tarif paketidir. Birinci paket bu ilin yazında qəbul edilmiş və 21 milyard avro dəyərində məhsulu əhatə etmişdi. Lakin Aİ həmin tariflərin qüvvəyə minməsini təxirə salaraq ABŞ ilə bütün tariflərin ləğvini müzakirə etməyə üstünlük vermişdi. Bununla belə, ABŞ-ın Avropadan idxal olunan polad və alüminiuma qarşı tətbiq etdiyi 10 faizlik rüsumlar hələ də qüvvədə qalır.
