BAKI, AzerVoice

"Emirates" aviaşirkəti uzun fasilədən sonra Dəməşqə uçuşları bərpa edib.

AzerVoice xəbər verir ki, bu barədə aviaşirkətin rəsmi saytında məlumat verilib.

Bildirilib ki, "Emirates"-in 2012-ci ildən sonra Dəməşqə ilk uçuşu bu gün cədvələ uyğun şəkildə təyinat yerinə çatıb.

Birləşmiş Ərəb Əmirlikləri hökumətinin mətbuat xidmətindən verilən məlumata görə, ilkin mərhələdə "Emirates" həftədə üç dəfə Dəməşqə uçuş həyata keçirəcək, lakin avqustun 2-dən etibarən bu reyslərin sayı dördə çatdırılacaq. Üstəlik, oktyabrın 26-dan gündəlik uçuşlara keçid planlaşdırılır.

Qeyd edək ki, "Emirates Airlines"-ın Dəməşqə reysləri Suriyada baş verən iğtişaşlarla əlaqədar olaraq 2012-ci ildə dayandırılmışdı. Həmin vaxt aviaşirkət bildirmişdi ki, Suriya hakimiyyəti hava limanına aparan bütün yolları bağlayıb.

Suriya ilə hava əlaqəsinin bərpasına dair qərar 13 aprel tarixində Suriya prezidenti Əhməd Əş-Şəraanın BƏƏ-yə rəsmi səfərindən sonra qəbul olunub.