BAKI, AzerVoice

ABŞ-da yerləşən Kolumbiya Universiteti ötən il universitetdə keçirilən Fələstinə dəstək aksiyalarında iştirak edən bəzi tələbələrin universitetdən xaric edildiyini və ya müvəqqəti olaraq uzaqlaşdırıldığını bildirib.

AzerVoice xəbər verir ki, Kolumbiya Universiteti Fələstinə dəstək verən bəzi tələbələri universitetdən qovdu.

Kolumbiya Universiteti, ABŞ hökumətinin tələblərini qəbul edərək universitetin 400 milyon dollarlıq maliyyə vəsaitinin dayandırılmasından sonra, Fələstinə dəstək verən tələbələrə qarşı intizam tədbirlərini açıqlayıb.

Açıqlamada qeyd olunub ki, cəzalandırılan tələbələr 1 ildən 3 ilə qədər dəyişən müddətlərdə universitetdən uzaqlaşdırılıb və ya tamamilə universitetdən xaric edilib. Ancaq neçə tələbənin bu cəzaya məruz qaldığı barədə məlumat verilməyib.

Kolumbiya Universitetinin "Apartheid Divest" adlı tələbə qrupu verdiyi açıqlamada təxminən 80 tələbəyə intizam cəzasının tətbiq edildiyini bildirib.

Qeyd edək ki, Kolumbiya Universitetində Fələstini dəstəkləyən tələbələr, 16 aprel 2024-cü ildə universitetin İsrailin Qəzzada həyata keçirdiyi hücumları və işğalı dəstəkləyən şirkətlərə maliyyə yatırımlarını davam etdirməsini etirazla qarşılamaq üçün kampusun həyətində oturaq aksiya keçirmiş və "Qəzzə ilə Həmrəylik Düşərgəsi" adı altında çadırlar qurmuşdu.

Etirazların ikinci günündə, o zamankı rektor Minouche Shafik-in çağırışı ilə kampusa daxil olan polis qüvvələri 108 tələbəni həbs etmişdi.

Daha sonra, 29 aprel 2024-cü ildə universitet rəhbərliyi ilə aparılan danışıqların nəticəsiz qalması səbəbilə tələbələr universitetin tarixi Hamilton Hall binasına daxil olmuş, bir gün sonra isə universitet rəhbərliyinin çağırışı ilə NYPD-yə bağlı çevik polis qüvvələri binaya müdaxilə edərək binanı boşaltmışdı. Polis onlarca tələbəni həbs etmiş və həyətə qurulan çadır düşərgəsini dağıtmışdı.

Donald Tramp administrasiyası, 7 martda Kolumbiya Universitetinin 400 milyon dollarlıq maliyyəsini "antisemitizmə qarşı mübarizədə yetərsiz olduğu" səbəbiylə ləğv etmişdi.

22 martda isə universitet Trampın tələblərinə əsaslanaraq antisemitizmin tərifinin yenidən gözdən keçiriləcəyini, həmçinin İsrail və Yəhudi Araşdırmaları İnstitutunun heyətinin genişləndiriləcəyini açıqlamışdı.

Kolumbiya Universitetində başlayan Fələstinə dəstək aksiyaları ölkə üzrə 50-dən çox universitetə yayılmış və bu aksiyalar zamanı polis, əksəriyyəti tələbə və universitet əməkdaşı olmaqla 3 min 100-dən çox şəxsi saxlamışdı.