BAKI, AzerVoice
İsrailin HƏMAS-la danışıqlar apardığı nümayəndə heyəti Qətəri tərk edib.
AzerVoice xəbər verir ki, bu barədə diplomatik mənbələr məlumat yayıb.
İsrail Baş nazirinin ofisinin adı açıqlanmayan nümayəndəsi “The Times of Israel” nəşrinə bildirib ki, İsrail nümayəndə heyətinin Dohanı tərk etməsi, Qəzza zolağında atəşkəslə bağlı HƏMAS-la aparılan danışıqların çıxılmaz vəziyyətdə olduğunu göstərir.
Bununla belə, qeyd olunub ki, danışıqlar uğursuzluqla nəticələnməyib və nümayəndə heyətinin Qətərdən ayrılması bütün tərəflərlə razılaşdırılıb.
“Qəbul edilməli qərarlar var və nümayəndə heyəti məsləhətləşmələr üçün qayıdıb. Hələlik hər şey müsbət istiqamətdə gedir” – deyə, İsrailin "Kan" dövlət televiziyasının mənbəsi bildirib.
Qeyd edək ki, HƏMAS İsraildən 2023-cü il oktyabrın 7-dən sonra Qəzzada saxlanılan 2 000 fələstinli və ömürlük həbsə məhkum olunmuş daha 200 fələstinlinin azad olunmasını, əvəzində isə 10 girovun geri qaytarılmasını tələb edir. İsrail rəsmiləri ABŞ-ın Yaxın Şərq üzrə xüsusi nümayəndəsi Stiven Uitkoffa bu tələblərin qəbuledilməz olduğunu bildiriblər. Mənbənin sözlərinə görə, İsraildə bu tələblər hələlik son qərar kimi qəbul olunmur.
İsrailin Baş naziri Benyamin Netanyahu HƏMAS-ın girovlarla bağlı son təklifə verdiyi cavabdan sonra danışıqlarda iştirak edən nümayəndə heyətinin məsləhətləşmələr üçün Qətərdən geri çağırılmasını əmr edib. Bundan əvvəl İsrail mətbuatı bildirmişdi ki, vasitəçilər HƏMAS nümayəndələri ilə keçirilən gərgin görüşdən sonra, qrupun İsrailin təşəbbüslərinə verdiyi cavabı ciddi hesab etməyərək, onu İsrailə təqdim etməkdən imtina ediblər.
