BAKI, AzerVoice
Avstraliya Baş naziri Entoni Albanese İsraili beynəlxalq hüququ açıq şəkildə pozmaqda ittiham edib, lakin Fələstin dövlətini tanımaq çağırışlarına qarşı çıxıb.
AzerVoice xəbər verir ki, bu barədə o “ABC” kanalına açıqlamada verib.
“Aydındır ki, humanitar yardımın çatdırılmasının qarşısını almaq beynəlxalq hüququn pozulmasıdır. İsrail demokratik ölkə olaraq günahsız insanların həyatını təhlükə altına atmamaq məsuliyyətini daşıyır. Biz isə həm israillilərin, həm də fələstinlilərin ölümünün şahidi olduq və hər bir insan həyatı dəyərlidir” - deyə, Albanese bildirib.
O qeyd edib ki, Avstraliya yaxın vaxtlarda Fələstin dövlətini tanımağı planlaşdırmır. Baş nazir, iki dövlətli həllə doğru əlavə addımlar atılmalı olduğunu vurğulayıb – baxmayaraq ki, onun rəhbərlik etdiyi Leyborist Partiyasından hökumətə bu yöndə artan təzyiqlər var.
Albanese, acından əziyyət çəkən körpələrin və uşaqların görüntülərinə istinad edərək bildirib ki, günahsız insanlar öldürülməməlidir.
“Bir yaşlı körpə HƏMAS döyüşçüsü deyil. Qəzzada mülki şəxslərin həlak olması tamamilə qəbuledilməzdir və bu, heç cür müdafiə edilə bilməz” - deyə, o vurğulayıb.
Qeyd edək ki, bu gün İsrail Qəzzaya havadan humanitar yardımın endirilməsinə başlayacağını və BMT karvanları üçün humanitar dəhlizlərin yaradılacağını açıqlayıb, lakin bunun nə zaman və harada həyata keçiriləcəyinə dair məlumat verilməyib.
