BAKI, AzerVoice
Ukrayna Rusiyanın bir sıra vətəndaşlarına, həmçinin Rusiya, Çin, BƏƏ və İrana məxsus hüquqi şəxslərə qarşı sanksiyalar tətbiq edib.
AzerVoice xəbər verir ki, bununla bağlı Ukrayna Prezidenti Volodimir Zelenski fərman imzalayıb.
Bildirilib ki, Ukrayna bu sanksiyaları Avropa İttifaqının (Aİ) 18-ci sanksiya paketi ilə uyğunlaşdırıb. Ukraynanın Sanksiyalar üzrə səlahiyyətli nümayəndəsi Vladislav Vlasyukun sözlərinə görə, sanksiyalar Rusiya, Çin, BƏƏ, İran və digər ölkələrin kölgə donanması, ikili təyinatlı malların sanksiyalardan yayınaraq tədarükü və Rusiya hərbi-sənaye kompleksi ilə əlaqəsi olduğu şirkətləri əhatə edir.
Bundan əlavə, Vlasyuk bildirib ki, Kiyev nadir torpaq elementləri və nadir metalların hasilatı, emalı və tədarükü ilə bağlı şirkət və şəxslərə qarşı da sanksiyalar tətbiq edib.
Bundan əvvəl, Zelenski Rusiyanın maliyyə sxemlərini, xüsusilə kriptovalyuta vasitəsilə həyata keçirilən əməliyyatlarını hədəfləyən sanksiya paketi imzalamışdı. Bu paket Ukrayna və tərəfdaş sanksiyaların sinxronizasiyasını da ehtiva edirdi.
