BAKI, AzerVoice
Cənub-Şərqi Asiyada təsirini göstərən Wipha qasırğası Tayland və Laosda daşqınlar, torpaq sürüşmələri və humanitar fəlakətlə nəticələndi. Təbii fəlakət nəticəsində hər iki ölkədə ümumilikdə 11 nəfər həlak olub, yüzlərlə insan yaralanıb və minlərlə ev zərər görüb.
AzerVoice xəbər verir ki, bu barədə Tayland Fəlakətlərin Qarşısının Alınması və Müdaxilə Departamenti (DDPM) məlumat yayıb.
Məlumata görə, Wipha qasırğasının təsiri ilə ölkənin 33 əyalətində daşqınlar və torpaq sürüşmələri baş verib. Fırtınanın ən çox şimal bölgələrdə təsirli olduğu qeyd edilir.
Təcili tibbi yardımlar və xilasetmə tədbirləri davam edir. Rəsmi məlumatlara əsasən, ən azı 7 nəfər həyatını itirib, 143 nəfər isə yaralanıb. Daşqınlar nəticəsində 43 səhiyyə müəssisəsi zərər çəkib, lakin mobil qruplar vasitəsilə yardım fasiləsiz davam etdirilir.
Tayland Kral Ordusu fəlakət bölgələrinə qayıqlar, tikinti texnikası və dronlarla yardım çatdırır. Hərbi briqadalar sığınacaqlara çata bilməyən ailələrə səyyar tibbi xidmət göstərirlər.
Tayland Meteorologiya İdarəsi yaxın günlərdə yağışların zəifləyəcəyini bildirsə də, dağlıq bölgələrdə torpaq sürüşməsi təhlükəsinin hələ də davam etdiyini açıqlayıb.
Wipha fırtınasından təsirlənən digər ölkə Laos olub. Hökumət rəsmisi Vongkham Phanthanuovong-un verdiyi açıqlamaya görə, 34 şəhər və 262 kənddə təxminən 15 min ailə fəlakətdən zərər çəkib. 4 nəfər həyatını itirib, 4 nəfər isə itkin düşüb. Ümumilikdə 2000-dən çox ev zərər görüb, 183 ev tamamilə dağılıb.
Hazırda hər iki ölkədə humanitar yardım və bərpa işləri davam etdirilir. Əhali təhlükəsizlik məqsədilə sığınacaqlara köçürülür, hökumətlər beynəlxalq yardım çağırışları edirlər.
