BAKI, AzerVoice
Böyük Britaniyada siber təcavüz hallarında ciddi artım qeydə alınıb.
“British Journal of Criminology” jurnalında dərc olunan genişmiqyaslı tədqiqata əsasən, 2012–2020-ci illər arasında ölkədə siber təcavüz hadisələrinin sayı 70 faiz artıb. Bu artım tempi fiziki təqiblə müqayisədə daha yüksəkdir və siber təcavüzün getdikcə yayğınlaşan zorakılıq forması olduğunu göstərir.
Araşdırma İngiltərə və Uelsdə ümumilikdə 147 min 800 nəfərin iştirak etdiyi sorğular əsasında aparılıb. Respondentlərin rəqəmsal və fiziki təcavüzlə bağlı yaşadıqları təcrübələr, bu halların ictimai qəbul səviyyəsi və yayılma dinamikası təhlil edilib.
Tədqiqatın nəticələrinə görə, 2020-ci ildə respondentlərin 1,7 faizi siber təcavüzə məruz qaldıqlarını bildirib. Halbuki bu rəqəm 2012-ci ildə cəmi 1 faiz idi. Bu göstəricilər siber təcavüz hallarının səkkiz il ərzində 70 faiz artdığını sübut edir.
Tədqiqatçılar Böyük Britaniya hökumətini bu sahədə ciddi addımlar atmağa çağırırlar. Onların tövsiyələrinə aşağıdakılar daxildir:
Siber təcavüzün hüquqi tərifinin dəqiqləşdirilməsi
Qurbanlar üçün psixososial və hüquqi dəstək sistemlərinin qurulması
Cəmiyyətin bu barədə maarifləndirilməsi və erkən müdaxilə mexanizmlərinin tətbiqi
Ekspertlər hesab edirlər ki, bu kimi zorakılıq formalarının “adi hal” kimi qəbul olunması, xüsusilə gənclər arasında davranışın fəsadlarını gizlədir və problemin köklənməsinə səbəb olur.
