BAKI, AzerVoice, Səməd Əyyubov
Finlandiya Prezidenti Aleksandr Stubb bildirib ki, əgər hökumət Fələstin dövlətinin tanınması ilə bağlı təklif irəli sürərsə, o, bu təşəbbüsü dəstəkləməyə hazırdır.
AzerVoice xəbər verir ki, bu barədə Stubb, "X" sosial şəbəkə hesabında yazıb.
“Həm israillilər, həm də fələstinlilər uzun müddətdir böyük əzab çəkirlər. sraildə zorakılıq təhlükəsi real olaraq qalır. Bir çox terror təşkilatları, dövlətlər və HƏMAS hələ də İsrailin mövcudluğunu tanımır. Eyni zamanda, Qəzzadakı humanitar vəziyyət dözülməz həddə çatıb. Uşaqlar ərzaq çatışmazlığı səbəbindən aclıqdan ölür, yemək axtaran mülki insanlar atəşə tutulur. Uzunmüddətli və dayanıqlı sülh üçün iki dövlət prinsipinə əsaslanan həll yolu vacibdir” - deyə, Stubb vurğulayıb.
“Əgər Finlandiya Fələstini tanıyarsa, bu addımımızla sülhü təşviq etmiş olarıq. Eyni zamanda İsraili hələ tanımayan ərəb ölkələrinin də İsraili tanıması vacibdir” - deyə, o əlavə edib.
O qeyd edib ki, Fələstin dövlətinin tanınması hökumətin təqdim edəcəyi təklif əsasında baş verə bilər.
“Bir dövlətin tanınması prezidentin qərarıdır, lakin bu, hökumətin təqdim edəcəyi təklif əsasında baş verir. Əgər Fələstin dövlətinin tanınmasına dair təklif verilərsə, mən onu qəbul etməyə hazıram. Bu təklifi edib-etməmək isə hökumətin qərarıdır. Finlandiya cəmiyyətində bu məsələ ilə bağlı fərqli fikirlərin və narahatlıqların olduğunu anlayıram. Fələstin də daxil olmaqla xarici siyasət məsələlərində açıq, dürüst və obyektiv müzakirələri təşviq etmək istəyirəm” - deyə, o bildirib.
Qeyd edək ki, Finlandiyada ifrat sağçı Fin Partiyası və Xristian Demokratlar Fələstin dövlətinin tanınmasına qarşı çıxırlar. Fransa, Kanada və digər bir neçə ölkə isə sentyabr ayında keçiriləcək BMT-nin 80-ci Baş Assambleyasında Fələstini dövlət kimi tanıyacaqlarını bəyan ediblər.
