BAKI, Azervoice, Nərmin Ağayeva

Polşada keçirilən prezident seçkilərində qalib gələn Karol Navroçki parlamentdə and içərək ölkənin yeni prezidenti olub.

Azervoice xəbər verir ki, Navroçki andiçmə mərasimində çıxış edərək, Polşa Respublikasının bütün vətəndaşlar üçün ümumi dəyər olduğunu vurğulayıb və xalqın səsi olacağını bildirib. O, seçki kampaniyası zamanı üzləşdiyi təhqirlərə baxmayaraq, azad xalqın iradəsinin qalib gəldiyini qeyd edib və bölünmələrə baxmayaraq millətə xidmət edəcəyini vurğulayıb.

Karol Navroçki müstəqil namizəd kimi iştirak etdiyi seçkilərin ikinci turunda 50,89 faiz səs toplayaraq liberal və solçu qüvvələrin dəstəklədiyi Varşava meri Rafal Trzaskowskinin (49,11 faiz) üzərində qələbə qazanıb. Seçkidə təxminən 29 milyon seçici iştirak edib.

Polşada prezidentlik müddəti beş ildir və bir şəxs maksimum iki müddətə prezident seçilə bilər.