BAKI, AzerVoice, Səməd Əyyubov
London polisi Böyük Britaniyada qadağan olunmuş təşkilatlar siyahısına salınan Fələstin tərəfdarı "Palestine Action" hərəkatına dəstək aksiyasında 365 nəfəri saxlayıb.
AzerVoice xəbər verir ki, London polisinin verdiyi açıqlamaya görə, digər hüquq pozuntularına görə daha yeddi nəfər həbs edilib, onlardan beşi polis əməkdaşına hücum etməkdə ittiham olunur. Məlumata görə, ciddi xəsarət alan olmayıb.
Ümumilikdə avqustun 9-da yüzlərlə insan indiyədək keçirilən ən böyük dəstək aksiyasına qatılıb. Oturaq etiraz aksiyası Vestminster sarayının qarşısındakı Parlament meydanında baş tutub. Hərəkatın fəalları artıq bir aydan çoxdur davam edən və təxminən 500 nəfərin saxlanılmasına səbəb olan etirazları davam etdirəcəklərini, bununla da Böyük Britaniyanın məhkəmə sistemini yükləyib hakimiyyəti qadağanı ləğv etməyə məcbur edəcəklərini bəyan ediblər.
Qeyd edək ki, "Palestine Action" hərəkatı iyulun 5-də Böyük Britaniyanın daxili işlər naziri İvet Kuperin təklifi ilə ölkədə qadağan olunmuş təşkilatlar siyahısına salınıb. Onun təşəbbüsü parlamentin hər iki palatası tərəfindən dəstəklənib. Bu təşkilata üzvlük, iclaslarında iştirak və fəaliyyətinə hər hansı formada dəstək cinayət hesab olunur və maksimum 14 il həbs cəzası ilə nəticələnə bilər.
İyunun 20-də "Palestine Action" fəalları İngiltərənin cənubundakı Oksfordşir qraflığında yerləşən Brayz-Norton aviabazasına daxil olaraq Britaniya Hərbi Hava Qüvvələrinə məxsus iki "Voyager" yanacaqdaşıyan təyyarəsini zədələyiblər. Hərəkat nümayəndələri bu addımı Londonun Qəzzada soyqırımda və Yaxın Şərqdəki hərbi cinayətlərdə iştirak etməsi ilə əsaslandırıblar. Onların sözlərinə görə, Böyük Britaniya hərbi yüklər göndərir, Qəzza zolağı üzərində kəşfiyyat təyyarələri uçurur və ABŞ və ya İsrail qırıcılarını yanacaqla təmin edir.
