BAKı, AzerVoice, Nərmin Ağayeva

ABŞ-ın vitse-prezidenti JD Vance, Rusiya-Ukrayna müharibəsinin maliyyələşdirilməsi mövzusunda mövqelərini açıqlayaraq, bölgədə sülhün vacibliyini vurğulayıb.

AzerVoice xəbər verir ki, Fox News-a müsahibəsində Vance, “Ukrayna müharibəsini maliyyələşdirməkdən yorulmuşuq. Biz bunun sülh yolu ilə həllini tapmaq istəyirik” - deyə bildirib. O, Amerika xalqının da vergi dollarlarının müharibəyə xərclənməsindən bezdiyini, Avropa ölkələrinin isə məsuliyyəti daha çox üzərinə götürməli olduğunu bildirib.

Vance, İngiltərə səfərində Avropa tərəfdaşlarına “Bu müharibə sizin qapınıza gəlib. Əgər münaqişəyə bu qədər əhəmiyyət verirsinizsə, maliyyələşdirmədə daha birbaşa rol almalısınız” mesajı verdiklərini qeyd edib.

Xatırladaq ki, ABŞ prezidenti Donald Tramp və Rusiya prezidenti Vladimir Putinin 15 avqustda Alyaskada keçiriləcək görüşü iki ölkə münasibətləri üçün mühüm simvolik məna daşıyır.

1867-ci ildə Rusiyadan alınan Alyaska, bəzən rus millətçilərinin “geri qaytarmaq” çağırışları ilə gündəmə gəlir. Görüşün ABŞ ərazisində keçirilməsi Vaşinqtonun Moskvaya diplomatik açılım jesti kimi qiymətləndirilir.

Rusiya tərəfi Moskvada ikinci sammitin keçirilməsini və Arktika regionunda əməkdaşlığı təklif edir. Analitiklərə görə, Alyaska görüşü yalnız diplomatik deyil, həm də geosiyasi və iqtisadi maraqlar baxımından strateji başlanğıc ola bilər.