BAKI, AzerVoice, Nərmin Ağayeva
UEFA-nın İsrailə qarşı mövqeyi tənqid olunur.
AzerVoice xəbər verir ki, İsrailin Qəzzaya qarşı hücumları davam edərkən, UEFA-nın bu ölkəyə münasibətdə “ikili standart” sərgilədiyi iddiaları yenidən gündəmə gəlib.
Daha əvvəl İsrailin hücumları zamanı həlak olan Fələstin millisinin sabiq futbolçusu, “Fələstinli Pele” ləqəbli Süleyman Əl-Obaidlə bağlı başsağlığı mesajında İsrailin adını çəkməyən UEFA, bu dəfə də Superkubok matçı öncəsi nümayiş etdirilən pankartlardan İsrailə istinad etməyib.
UEFA Əl-Obaid barədə paylaşımında “Fələstinli Pele Süleyman Əl-Obaidə vida. Ən qaranlıq vaxtlarda belə saysız-hesabsız uşağa ümid bəxş edən istedad” sözlərini yazıb. Məsələ ilə bağlı “Liverpul”un misirli futbolçusu Məhəmməd Salah, “Bizə necə, harada və niyə öldüyünü deyə bilərsinizmi?” sualı ilə öz reaksiyasını bildirib.
Fələstin Futbol Federasiyası açıqlamasında Əl-Obaidin Qəzzada humanitar yardım gözləyərkən İsrail hücumu nəticəsində şəhid olduğunu bildirib.
İtaliyanın Udine şəhərində PSJ ilə Tottenham Hotspur arasında keçirilən UEFA Superkuboku matçı öncəsində açılan “Uşaqları öldürməyə son” və “Mülki insanları öldürməyə son” pankartlarında da İsrailin adı qeyd olunmayıb. Bu isə sosial mediada və idman ictimaiyyətində narazılığa səbəb olub.
Tənqidçilər, UEFA və FİFA-nın İsrailə münasibətini Rusiyaya qarşı göstərilən sərt mövqe ilə müqayisə edirlər. 2022-ci ildə Ukraynaya hücumdan cəmi bir neçə gün sonra UEFA və FİFA Rusiyanın milli komandalarını və klublarını bütün beynəlxalq turnirlərdən kənarlaşdırmışdı.
Lakin İsrailin 7 oktyabr 2023-cü ildən bəri Qəzzada həyata keçirdiyi hücumlar nəticəsində on minlərlə insanın, o cümlədən idmançıların həyatını itirməsinə baxmayaraq, bu ölkəyə qarşı heç bir sanksiya tətbiq edilməyib.
Fələstin Futbol Federasiyasının İsrailin turnirlərdən kənarlaşdırılması ilə bağlı müraciətinə isə FİFA indiyədək cavab verməyib.
