BAKI, AzerVoice, Səməd Əyyubov
Moskva Ukraynanın təhlükəsizliyini təmin etmək üçün Vaşinqtonla işləməyə hazırdır.
AzerVoice xəbər verir ki, bu barədə Rusiya prezidenti Vladimir Putin ABŞ prezidenti Donald Tramp ilə görüşdən sonra keçirilən birgə mətbuat konfransında bildirib.
“Prezident Trampın bu gün dediyi kimi, Ukraynanın təhlükəsizliyi təmin edilməlidir. Əlbəttə, biz bunun üzərində işləməyə hazırıq” – deyə, Putin qeyd edib.
O, həmçinin vurğulayıb ki, Ukrayna nizamlanmasının davamlı və uzunmüddətli olması üçün böhranın bütün ilkin səbəbləri aradan qaldırılmalı, Rusiyanın bütün maraqları nəzərə alınmalı, Avropada və ümumilikdə dünyada təhlükəsizlik sahəsində ədalətli balans bərpa edilməlidir.
Xatırladaq ki, bundan əvvəl Alyaskada yerləşən “Elmendorf-Riçardson” hərbi bazasında iki liderin məhdud formatda görüşü baş tutub. Görüşdə Rusiya tərəfini Prezidentin köməkçisi Yuri Uşakov və xarici işlər naziri Sergey Lavrov, ABŞ tərəfini isə dövlət katibi Marko Rubio və Prezidentin xüsusi nümayəndəsi Stiven Uitkoff təmsil edib. Liderlər əvvəlcə qısa söhbət aparıb, daha sonra “üçə-üç” formatında əsas müzakirələrə keçiblər.
