BAKI, AzerVoice, Nərmin Ağayeva
Cənubi Afrikada TotalEnergies-in neft və qaz kəşfiyyatı lisenziyası ləğv edilib.
AzerVoice xəbər verir ki, Cənubi Afrikanın Ali Məhkəməsi Fransanın TotalEnergies şirkətinə ölkənin cənub-qərb sahillərində verilmiş karbohidrogen kəşfiyyatı lisenziyasını ləğv edib.
Qərara əsas səbəb kimi kəşfiyyat fəaliyyətinin ətraf mühitə təsirlərinin yetərincə qiymətləndirilməməsi və yerli sakinlərin mümkün neft dağılması riskləri barədə kifayət qədər məlumatlandırılmaması göstərilib.
Məhkəməyə ətraf mühit təşkilatları Natural Justice və Green Connection tərəfindən müraciət olunmuşdu. Onlar Cape Town və Cape Agulhas arasındakı sahildən təxminən 10 min kvadrat kilometr məsafədə aparılacaq işlərin təhlükə yaratdığını əsas gətiriblər.
Green Connection təşkilatı qərarı alqışlayaraq, bunun bütün Cənubi Afrikalılar və hətta qonşu ölkələr üçün böyük əhəmiyyət daşıdığını, ekoloji və sosial riskli layihələrə qarşı ciddi mesaj verdiyini bəyan edib.
Qeyd edək ki, Cənubi Afrikanın Mineral Ehtiyatlar və Energetika Nazirliyi 2023-cü ildə TotalEnergies-ə 10 min kvadrat kilometrlik ərazidə beş kəşfiyyat quyusu ilə məhdudlaşan lisenziya vermişdi. Ölkə məhkəməsi 2022-ci ildə isə Shell şirkətinin Şərqi Cape yaxınlığında seysmik kəşfiyyat fəaliyyətini ekoloji təhlükələrə görə dayandırmışdı.
