BAKI, AzerVoice, Səməd Əyyubov
ABŞ prezidenti Donald Tramp bildirib ki, bütün tənqidçilərinə baxmayaraq, Ukraynadakı böhrana son qoymaqda qətiyyətlidir.
AzerVoice xəbər verir ki, bu barədə o "Truth social" platformasında yazıb.
“Əgər mən prezident olsaydım, Ukrayna münaqişəsi heç vaxt baş verməzdi. Mən dəqiq bilirəm nə etdiyimi və illərlə bu münaqişələr üzərində işləyib onların qarşısını almaq üçün heç nə edə bilməyən insanların məsləhətlərinə ehtiyacım yoxdur. Onlar sağlam düşüncədən, intellektdən və anlayışdan məhrum ‘axmaq’ adamlardır və yalnız Rusiya ilə Ukrayna arasındakı bu fəlakətin həllini çətinləşdirirlər” – deyə, Tramp bildirib.
“Bütün qısqanc tənqidçilərimə baxmayaraq, mən bunun öhdəsindən gələcəyəm. Mən həmişə bunu etmişəm və indi də edəcəyəm” – deyə, o əlavə edib.
Xatırladaq ki, Alyaskanın Ankoric şəhərində yerləşən “Elmendorf-Riçardson” hərbi bazasında iki liderin məhdud formatda görüşü baş tutub. Görüşdə Rusiya tərəfini Prezidentin köməkçisi Yuri Uşakov və xarici işlər naziri Sergey Lavrov, ABŞ tərəfini isə dövlət katibi Marko Rubio və Prezidentin xüsusi nümayəndəsi Stiven Uitkoff təmsil edib. Liderlər əvvəlcə qısa söhbət aparıb, daha sonra “üçə-üç” formatında əsas müzakirələrə keçiblər. Görüşdən sonra dövlət başçıları birgə mətbuat konfransında çıxış ediblər.
